![](https://kallxo.com/wp-content/uploads/2018/09/Lutfi-Haziri-01-Foto-KALLXOcom.jpg)
Sa vota mori Lutfi Haziri në fshatin e vet?
Tre ditë pas zgjedhjeve të parakohshme parlamentare janë numëruar të gjitha votat e rregullta ndërsa janë duke u numëruar votat nga diaspora.
Në rezultatet e deritanishme Lëvizja Vetëvendosje ka dalë e para, e përcjellur nga Lidhja Demokratike e Kosovës.
E njëri prej qyteteve në të cilën mori shumë vota LVV e Albin Kurtit është Gjilani. Kjo komunë udhëhiqet nga nënkryetari i LDK-së, Lutfi Haziri.
LVV në Gjilan mori plot 17 mijë e 864 vota apo 39.75 për qind të të gjitha votave. Në anën tjetër, LDK në Gjilan mori 12 mijë e 217 vota apo 27.18 për qind.
Dallimi ndërmjet dy partive me vota ishte 5 mijë e 647 vota.
LDK që në zgjedhjet e 6 tetorit kandidoi me Vjosa Osmanin për shefe të Qeverisë, zgjodhi pikërisht Gjilanin që ta përmbyllte fushatën elektorale. Njeriu që udhëheq me qytetin e Gjilanit ishte i bindur se në këtë komunë do të korrte fitore.
Por, Lutfi Haziri si duket nuk i bindi votuesit gjilanas në përgjithësi. Megjithatë, në fshatin e tij të lindjes ai fitoi mbi gjysmën e votave.
Në qendrën e votimit 0446d, në fshatin Llovcë, sipas KQZ-së i LDK mori 44 vota apo 52.38 për qind të numrit të përgjithshëm
Zgjedhjet e përgjithshme parlamentare u mbajtën më 6 tetor.
Deri më tani fituese e këtyre zgjedhjeve është Lëvizja Vetëvendosje me 203 mijë e 052 vota apo 25.49 për qind. Ndërsa, LDK doli e dyta me 197 mijë e 702 vota apo 24.82 për qind të votave. Në këtë rezultat nuk janë numëruar votat e diasporës votat me kusht, me postë dhe të personave me aftësi të kufizuara.