COVID-19
Rritet drastikisht numri i pacientëve me COVID-19 në Klinikën Infektive
16.6.2020 - 11:31
Në Klinikën Infektive janë të shtruar 53 pacientë të infektuar me COVID-19, numër disa fish më i lartë se sa ishte disa javë më parë.
Sipas Klinikës, 33 raste janë në gjendje stabile, 20 pacientë janë duke u trajtuar me oksigjenoterapi dhe përkujdesje intensive, prej të cilëve një rast në gjendje të rëndë është duke u trajtuar në Repartin e Mjekimit Intensiv të Klinikës Infektive.
Në komunikatën e Klinikës thuhet se në pritje të rezultateve janë 3 pacientë, ndërsa 1 pacient i cili rezultoi negativ në testimet e fundit për COVID- 19 vazhdon trajtimin në klinikë.
Sipas njoftimit, sot lirohet nga klinika një paciente e shëruar nga infeksioni me COVID- 19.