Rasti i 53 milionshit - Gjykata e Apelit e kthen në pikën zero dënimin ndaj Pal Lekajt dhe të tjerëve

Rasti i 53 milionshit do të gjykohet përsëri në Gjykatën e Shkallës së Parë.

Gjykata e Apelit ka marrë Vendim që rasti në të cilin akuzohen ish-zyrtarët e lartë të Ministrisë së Infrastrukturës të kthehet në pikën zero të gjykimit.

Gjykata e Apelit ka vendosur që t’i kthejë në Rigjykim Vendimet dënuese për ish-ministrin Pal Lekaj dhe zyrtarët e tjerë: Nebih Shatri, Besim Tahiri dhe ish-këshilltari politik i Pal Lekajt, Eset Berisha.

Këtë Vendim e ka marrë Gjykata e Apelit duke i aprovuar Ankesat e mbrojtësve të të pandehurve, lidhur me këtë rast.

“Aprovohen si të bazuara Ankesat e mbrojtësve së të pandehurve: P.L., avokat Artan Qerkini, N.SH., avokat Florent Latifaj, E.B., avokat Afrim Salihu, B.T., avokat Urim Vokshi dhe Ankesa e vetë të akuzuarit E.B., e sipas detyrës zyrtare anulohet Aktgjykimi i Gjykatës Themelore në Prishtinë – Departamenti Special, PS.nr.4/2022, më 31.01.2024 dhe çështja penale kthehet në Rigjykim dhe Rivendosje.” – thuhet në Vendimin e Gjykatës së Apelit.

Për këtë rast ishin gjykuar dhe dënuar nga Shkalla e Parë ish-ministri i infrastrukturës, Pal Lekaj, me 3 vjet e 8 muaj “burgim” dhe me dënim plotësues prej 3 vjet e 6 muajsh “ndalim i ushtrimit të funksionit në Administratë Publike”.

Ish-këshilltari i Pal Lekajt, Eset Berisha është dënuar me 3 vjet e 3 muaj “burgim” dhe dënim plotësues prej 3 vjetësh “ndalim i ushtrimit të funksionit në Administratë publike”.

Sekretari i Përgjithshëm i Ministrisë së Infrastrukturës për kohën kur ishte ngritur Aktakuza, Nebih Shatri dhe drejtori i Prokurimit Publik në këtë Ministri, Besim Tahiri janë dënuar secili me nga një vjet e tetë muaj “burgim” dhe me dënim plotësues prej 2 vjetësh “ndalim i ushtrimit të funksionit në Administratë publike”.

Lajmi në përditësim…

Aktakuza

Prokuroria Speciale, më 4 shkurt 2022, kishte ngritur Aktakuzën për ish-ministrin e Infrastrukturës Pal Lekajn, këshilltarin e tij politik Eset Berishën dhe sekretarin e përgjithshëm të Ministrisë së Infrastrukturës Nebih Shatrin dhe Besim Tahirin – lidhur me ekzekutimin e 53 milionë eurove për Kompaninë “Bechtel & Enka”, e cila ishte kontraktuar për ta ndërtuar autostradën “Arbën Xhaferi”.

Sipas Aktakuzës, Pal Lekaj, Nebih Shatri dhe Besim Tahiri me dashje i kanë tejkaluar kompetencat e tyre dhe nuk i kanë përmbushur detyrat e tyre zyrtare, më 29 shtator 2017.

Sipas Prokurorisë, keqpërdorimi ka ndodhur në momentin kur të lartcekurit kanë nënshkruar Marrëveshjen për shtyrjen e afatit të përfundimit të punimeve për 347 ditë të tjera, për autostradën “Arbën Xhaferi”, apo e njohur si R6.

Përfundimi i autostradës me Kontratën bazë, e cila ishte lidhur në vitin 2014, parashihej të përfundonte me 18 janar 2018, kurse me Marrëveshjen e re të lidhur nga të pandehurit, Kontrata tashmë do të përfundonte në fund të muajit dhjetor 2018.

Kjo Marrëveshje – sipas Prokurorisë – nga të pandehurit ishte lidhur pa kostot financiare, që ishte në kundërshtim me Ligjin e Prokurimit Publik dhe me Statutin dhe Kodin e Sjelljes të Komitetit Drejtues Ndërministror. Duke mos përcaktuar koston në Marrëveshje, Prokuroria thotë që të pandehurit i kanë lënë rrugën hapur Kompanisë “Bechtel & Enka”, që të paraqesë Kërkesë për pagesë.

Tutje, Aktakuza thotë se Pal Lekaj kishte angazhuar këshilltarin e tij politik, Eset Berishën që të merret me negociatat me Kompaninë “Bechtel & Enka”, për ta caktuar vlerën e Marrëveshjes, të cilën e kishin lënë të hapur.

Sipas pretendimeve të organit të akuzës, Pal Lekaj këtë veprim e ka bërë pa pasur pëlqimin e Komitetit Drejtues Ndërministror.

Kjo Kërkesë, në vlerë prej 63 milionë euro, ishte paraqitur më 27 nëntor 2017. Pastaj, sipas Prokurorisë ishte zbritur në vlerë prej 53 milionë eurosh, pas bisedimeve që kishte zhvilluar Berisha me Kompaninë ndërtuese. Me Rekomandim të Komitetit Drejtues Ndërministror, Qeveria e Kosovës e kishte aprovuar Kërkesën në qershor 2018.