Rakiq në takim me ambasadorin britanik, sërish mungon flamuri i Kosovës
Zëvendëskryeministri dhe ministri i Pushtetit Lokal, Goran Rakiq është takuar sot me ambasadorin e Britanisë së Madhe në Kosovë Nikolas Abboot.
Sipas një njoftimi për media, përveç situatës aktuale politike dhe pandemisë së shkaktuar nga virusi COVID-19, ata biseduan edhe për rëndësinë e vazhdimit të dialogut, sigurinë dhe zhvillimin ekonomik.
Tutje është thënë se Rakiq dhe ambasadori Abbott ranë dakord që bashkëpunimi i ngushtë midis MPL-së dhe ambasadës është thelbësore, që sipas tyre kontribuon në përmirësimin e kushteve jetësore të të gjithë qytetarëve, si dhe në përmirësimin e efikasitetit të qeverive lokale.
As në këtë takim, sipas fotove të dërguara nga Ministria e Pushtetit Lokal, nuk është parë ndonjë simbol i Kosovës.
Që nga dita kur e ka marrë detyrën e Zëvendës Kryeministrit dhe ministrit të Administrimit të Pushtetit Lokal në qeverinë Hoti, Goran Rakiq, ka publikar disa fotografi nga takimet e tij në të cilat nuk shihet askund flamuri i Kosovës.
Ligji për përdorimin e simboleve shtetërore të Kosovës, neni 4, pika 4.3 thotë se Flamuri shtetëror i Republikës së Kosovës përdoret në rastet e takimeve ceremoniale të përfaqësuesve të institucioneve shtetërore me përfaqësues të shteteve të huaja.
Por Rakiq nuk e ka vendosur flamurin në takimet me ambasadorin e SHBA-ve në Kosovë, Philipp Kosnett dhe me shefen e Zyrës së BE-së në Kosovë, Natalia Apostolova.
Kurse, presidenti i Kosovës, Hashim Thaçi sot deklaroi para mediave se të gjithë personat që nuk i respektojnë Kushtetutën, Ligjet dhe simbolet e Kosovës nuk mund të jenë pjesë e institucioneve të shtetit.
“Unë kudo që paraqitem gjithmonë janë simbolet edhe kur kam qenë kryeministër i vendit, përfaqësuesit e komuniteteve i kanë respektuar kushtetutën ligjin dhe simbolet, përndryshe nuk ka qëndruar asnjë minutë në zyrë e vet. Ai që nuk respekton kushtetutën dhe ligjet e shtetit nuk mund të jetë pjesë e institucioneve”, tha Thaçi, kur u pyet në lidhje me këtë çështje.
