Punonjësit e arsimit fillor e të mesëm në Viti nuk morën pagat e shtatorit, Ministria e Komuna fajësojnë njëra-tjetrën

Punonjësit e arsimit fillor dhe të mesëm në komunën e Vitisë nuk kanë marrë pagat për muajin shtator.

Këtë njoftim e bëri Ministria e Financave, e cila tha se kjo ka ndodhur pasi që Komuna nuk ka siguruar buxhetin e nevojshëm.

Ndërsa, nga Komuna e Vitisë thonë se ata nuk kanë faj, pasi që Ministria ka marrë mjetet për paga për të paguar obligimet e kontratave kolektive.

Ministra ka thënë se disa komuna kanë filluar që të kenë mungesë të buxhetit në kategorinë e pagave qysh tani si pasojë e rasteve përmbarimore, edhe pse “buxheti për paga ndahet asisoj që të mbulojë shpenzimin për tërë vitin”.

“Thesari i Kosovës ka njoftuar me kohë komunat të cilat janë ballafaquar me këtë problem që të bëjnë korrigjimet dhe përshtatjet e nevojshme për të siguruar buxhet të mjaftueshëm për ekzekutimin e pagave të muajit shtator, dhe të gjitha komunat e kanë bërë përpos njërës” – ka shkruar Ministria e Financave.

Drejtoresha e Financave në Komunën e Vitisë, Melihate Ajeti e kontaktuar nga KALLXO.com tha se ata nuk kanë asnjë faj për këtë problem.

Mungesa e buxhetit, ajo thotë se ka ardhur pasi që Thesari ka ekzekutuar pagesat që rrjedhin nga kontratat kolektive duke i marrë mjetet e ndara për paga të rregullta.

“Buxheti ka qenë për me i mbulu të gjitha pagat e rregullta, por jo edhe për obligimet që rrjedhin nga kontratat kolektive, që rrjedhin nga vitet e mëhershme. Ndërsa Thesari ka bërë ekzekutimin e vendimeve gjyqësore që rrjedhin nga kontratat kolektive” – tha Ajeti.

Drejtoresha shtoi se kjo i ka dëmtuar edhe te buxheti për mallra dhe shërbime, investime kapitale e subvencione edhe pse shton se komunat nuk kanë qenë nënshkruese të kontratave kolektive.

“Asnjëherë nuk është ndarë buxheti për këto shpenzime (të kontratave kolektive) kështu që na i kanë marrë vetëm për vitin 2024 deri më 12.08.2024, 3 milionë e 5 mijë e 776 euro e 23 centë. Për atë arsye edhe jemi në minus. Por, ne nuk kemi asnjë faj” – tha më tej Ajeti.

Sipas saj, Komuna nuk ka pasur mjetë të lira gjatë muajit shtator dhe e kanë pasur të pamundur të bëjnë zgjidhje në dy ditët e fundit.

Në njoftimin e saj, Ministria e Financave ka thënë se Thesari i ka dërguar në vazhdimësi njoftime Komunës së Vitisë duke përfshirë edhe ditën e djeshme, por “zyrtarët nuk kanë reflektuar”.

“Me qëllim që të mundësohet ekzekutimi i pagave për të gjithë punonjësit e komunës, Thesari i ka dërguar në vazhdimësi njoftime Komunës së Vitisë, përfshirë edhe ditën e djeshme, të cilëve u është dhënë mundësia gjatë gjithë ditës duke i pritur që t’i bëjnë rregullimet e nevojshme për të siguruar buxhet të mjaftueshëm për ekzekutim të plotë të pagave” – thuhet në njoftimin e Ministrisë.

E pyetur se a janë njoftuar më herët për këtë problem nga Ministria e Financave, ajo tha se janë njoftuar dje dhe pardje, ndërsa nuk është e sigurt nëse kanë marrë njoftim edhe më parë.

“Na ka lajmëru dje dhe pardje nëse jam e sigurt. Për më herët, zyrtarët e Zyrtarit Kryesor Financiar nuk e di, nuk më kanë lajmëru, nuk e besoj se ndoshta edhe na kishin lajmëru. Për këtë nuk jam shumë e sigurt por për dje dhe pardje po” – u përgjigj drejtoresha.

“Por nuk kemi mujt me i transferu prej investimeve kapitale me i qit për paga dhe mëditje. Nuk kemi të drejtë me ligj” – shtoi ajo.

Sa i përket zgjidhjet së këtij problemi, Ajeti nuk pati një përgjigje konkrete, por tha se nesër hapet sistemi i cili ka qenë i mbyllur që dy ditë për shkak të pagave dhe do ta shohin të bëjnë një zgjidhje në bashkëpunim me Kryetarin e Komunës, pasi që siç tha ajo “nuk munden ta lënë pa bërë zgjidhje”.

KALLXO.com mëson se Kryetari Sokol Haliti ka thirrur një takim për të diskutuar këtë problematikë.

Ministria është shprehur e gatshme që kurdo që Komuna bën përshtatjet e nevojshme dhe siguron buxhetin e mjaftueshëm, ajo të bëjë riekzekutimin e pagave për punonjësit që s’kanë pranuar pagat e tyre.