![](https://kallxo.com/wp-content/uploads/2020/07/Hashim-Thaçi-Skender-Hyseni-695x310.jpg)
Presidenti Thaçi takon Skender Hysenin, kërkojnë unitet politik për dialog me Serbinë
Presidenti i Kosovës, Hashim Thaçi sot është takuar me koordinatorin për dialogun Kosovë – Serbi, Skender Hysenin.
Takimi i tyre është bërë i ditur përmes një komunikate.
Në këtë takim Thaçi theksoi se në Bruksel duhet të dialogohet vetëm për marrëveshjen përfundimtare e cila sjell njohjen reciproke ndërshtetërore.
“E kam mirëpritur emërimin tuaj si koordinator për dialogun, sepse besoj fuqishëm në eksperiencën dhe qasjen tuaj gjithëpërfshirëse e përafruese mes gjithë spektrit politik në vend”, ka thënë Presidenti.
Presidenti së bashku me koordinatorin kanë ritheksuar se krijimi i unitetit politik e përcakton suksesin në procesin e dialogut me Serbinë.
Skender Hyseni është emëruar koordinator për dialogun Kosovë – Serbi pesë ditë më parë nga Kryeministri i vendit, Avdullah Hoti.
Skender Hyseni njëherësh është anëtar i Kryesisë së Lidhjes Demokratike të Kosovës (LDK), ndërkaq në të kaluarën ka qenë ministër i Punëve të Jashtme.