Plantacionet e drogës në Dukagjin

Në emisionin “KALLXO Përnime” po shfaqen pamje ekskluzive të aksionit “Vera 2024” të Njësive Speciale të Policisë dhe hetuesve të Departamentit kundër drogës të Policisë së Kosovës në zonën e Kliqinës dhe Sfërkes së Pejës, ku janë gjetur plantacione të drogës.

Ersan Qavolli, prokurori i Prokurorisë së Pejës, ka thënë para policëve se kanë dyshime për dy plantacione të drogës dhe një vend tjetër ku është duke u bërë tharja.

“Gjatë hetimeve të përbashkëta me zyrtarët policorë ne kemi dyshime të bazuara se kemi të bëjmë me një grup mirë të organizuar që kanë ndërtuar dy plantacione të drogës dhe një vend për tharjen e saj”-tha Qavolli.

Mëngjesin e hershëm të datës 27.09.2024, në oborrin e stacionit policor në Klinë po bëheshin gati për aksion mbi 100 zyrtarë policorë, e po ashtu hetues kundër lëndëve narkotike.

Për mos të rënë në sy nga të dyshuarit, pjesëtarët e Njësisë Speciale Intervenuse, nisen këmbë drejt zonave ku ishin ngritur plantacionet e kanabisit në zonën e fshatrave Kliqinë dhe Sferkë.

Policia e Kosovës afrohet në qetësi dhe e zë në gjumë të dyshuarin për drogë.

I njëjti ishte duke fjetur në pyllin afër vendit ku ishte duke e përpunuar droga.

Ndërsa të dyshuarit e tjerë afër plantacioneve të drogës arrijnë të largohen.

Prokuroria ka konfirmuar se të dyshuarit kanë lënë në vendin e ngjarjes dokumentet dhe telefonat e tyre dhe me të dhënat e siguruara ata janë shpallur në kërkim.

2,850 bimë të kultivuara dhe mbi 1,400 kilogramë marihuanë e gatshme për konsumim janë sekuestruar në ditën e aksionit e po ashtu sende të tjera të vlefshme për hetimin që është duke vazhduar ndaj personave që janë në kërkim.

Personi i arrestuar nga Republika e Shqipërisë të nesërmen ka dalë para Gjykatës dhe atij i është caktuar masa e paraburgimit prej 1 muaji.