Paralajmërohet pezullimi i Rusisë në FMN dhe Bankë Botërore

Bashkimi Evropian do të vendosë një pako të re të sanksioneve ndaj Rusisë si përgjigje ndaj pushtimit të Ukrainës.

Të shtunën, blloku “do të vendosë një pako të katërt masash për të izoluar më tej Rusinë dhe për të shteruar burimet që përdor për të financuar këtë luftë barbare”, tha në një deklaratë presidentja e Komisionit Evropian, Ursula von der Leyen. Kompanitë ruse nuk do të gëzojnë privilegje në ekonominë evropiane tha ajo.

Si e godasin Rusinë këto sanksione sipas Von der Leyen?

Masë tjetër do të jetë angazhimi për pezullim të Rusisë në Fondin Monetar Ndërkombëtar si dhe në Bankën Botërore.

“Do të sigurohemi që Rusia të mos mund të marrë asnjë financim, kredi apo përfitime tjera nga këto institucione”, tha Von der Leyen.

Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si “operacion special”. Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë./REL