Osmani falënderon FSK-në për ndihmën e dhënë në Turqi: Jemi krenarë me ju

Presidentja e Kosovës, njëherësh Komandantja Supreme e Forcës së Sigurisë së Kosovës, Vjosa Osmani ka falënderuar FSK-në, për ndihmën që kanë dhënë në Turqi pas tërmeteve të fundit.

Osmani është shprehur krenare me FSK-në dhe ka thënë se heroizmi i tyre na kujton dhembshurinë dhe solidaritetin e popullit tonë për të qëndruar krah për krah me miqtë tanë në kohë sfiduese.

“Trimëria dhe vendosmëria e palëkundur e ushtarëve tanë për të shpëtuar jetë nga rrënojat e tërmeteve shkatërruese në Turqi ngjallë shpresë në këtë tragjedi që ka shkaktuar trishtim në çdo cep të botës” – ka shkruar presidentja në Facebook.

Turqia dhe Siria u prekën nga dy tërmete të mëdha më 6 shkurt. Numri i të vdekurve ka shkuar mbi 30 mijë.

Ushtarët e Kosovës të dërguar me mision shpëtimi në Turqi deri më tani kanë shpëtuar katër persona, duke i nxjerrë ata nga rrënojat.