Në mesin e dhjetërave pozitave të rëndësishme në institucionet publike, Njësia e Intelegjencës Financiare vazhdon të jetë me ushtrues detyre. Kjo njësi e cila lufton dhe parandalon shpëlajren e parave, sipas ish-zyrtarëve të AKI-së, ka rëndësi edhe jashtë kufijve të Kosovës, dhe për këtë institucionet duhet të përshpejtojnë procedurat për zgjedhjen e drejtorit.
Muajin e kaluar janë bërë 2 vjet prej se Njësia e Inteligjencës Financiare është pa drejtor.
Kjo njësi në kuadër të Ministrisë së Financave, merret me parandalimin dhe luftimin e pastrimit të parave dhe financimin e terrorizmit.
Ky institucion tash e disa ditë nuk është përgjigjur në pyetjet e televizionit se për cilat arsye ende kjo pozitë është me ushtrues detyre dhe se kur do të zgjidhet drejtori i ri.
Anëtarë të shoqërisë civile thonë se institucionet duhet të ndryshojnë praktikën, në mënyrë që pozita të tilla të rëndësishme të mos lihen pa udhëheqës me mandat të plotë.
“Praktika e vendosjes së personave të caktuar si ushtrues detyre të udhëheqësve të institucioneve publike, paraqet një anomali në vete që rrjedh si rezultat i mungesës së dispozitave ligjore, të ligjeve materiale për përcjelljen e udhëheqësve të institucioneve publike, fatkeqësisht kjo mënyre e udhëheqjes së institucioneve publike, tashmë është bërë në mënyre sistematike dhe si duket ka një mungesë të vullnetit politik” – ka deklaruar Albana Hasani nga Lëvizja FOL.
Ish-kryeinspektori i Agjencisë Kosovare për Intelegjencë, Shkelzen Sopjani, thotë se kjo njësi është ndër më të rëndësishmet në Kosovë, dhe si e tillë duhet të trajtohet nga institucionet.
“Është një njësi që e ndjek paranë, që i bie që godet aty ku eshte pjesa më e rëndësishme e luftimit të këtyre fenomeneve, pra kjo njësi funksionin primar e ka shpërndarjen e inteligjencës dhe informatave tek institucionet e zbatimit të ligjit me theks të vecantë policissë së Kosovës por duke mos përjashtuar edhe prokurorinë” – ka thënë Shkelzen Sopjani, ish-kryeinspektor i AKI-së.
Sopjani tutje shton se Njësia e Intelegjencës Financiare, ka përgjegjësi edhe jashtë kufijve të Kosovës.
“Përveç që kontributi i saj është përbrenda kjo njësi rëndësi ka edhe për luftimin e krimit të organizuar tranznacional apo edhe terrorizimin ndërkombëtar dhe me vetë faktin që ka këtë rëndësi është me rëndësi që kjo njësi të mos ketë shkëputje në vazhdimësi në punën e saj, e me theks të veçantë të mos ketë të meta në procesin e vendimmarrjes” – ka theksuar Shkelzen Sopjani.
Njësia e Inteligjencës Financiare është pa drejtor që nga shkarkimi i Dardan Nuhiut, nga kjo pozitë, pas publikimit të disa incizimeve në gusht të vitit 2021.
Ky mekanizëm është në mesin e dhjetëra institucioneve që vazhdojnë funksionimin pa drejtor, por vetëm me ushtrues detyre./ Dukagjini
