Foto: Urim Krasniqi/KALLXO.com
MPJD: Deklarata e ambasadorit të Francës në Serbi nuk është qëndrim i Parisit zyrtar
Ambasadori i Francës në Serbi, Pierre Cochard në një intervistë për median serbe, TV Nova S ka thënë se nuk e mbështesin aplikim e Kosovës në Këshillin e Evropës, mirëpo nga Ministria e Punëve të Jashtme dhe Diaspores në Kosovë është thënë se ky nuk është qëndrimi i Parisit zyrtar.
Sharr Jakupi, shef i kabinetit të ministres së MPJD-së, Donika Gervalla ka thënë për KALLXO.com se lidhur me këtë deklaratë kanë pasur komunikim me Ministrinë e Punëve të Jashtme të Francës, por edhe me Ambasadën e Francës në Kosovë.
“Ajo çfarë ka deklaruar ambasadori i Francës në Serbi, Pierre Cochard, nuk është qëndrimi i Parisit zyrtar. Këtë e bazojmë në komunikimet që kemi pasur me Ministrinë e Punëve të Jashtme të Francës por edhe me Ambasadën e këtij shteti mik në Kosovë”, ka thënë Jakupi për KALLXO.com.
Tutje ai ka shtuar se misioni francez në Kosovë vazhdimisht ka konfirmuar mbështetjen në Këshillin e Evropës.
Siç raporton media serbe, TV Nova S, ambasadori Cochard për aplikimin e Kosovës në KE ka thënë se nuk i mbështesin vendimet e njëanshme.
Kosova më 12 maj ka aplikuar për anëtarësim në selinë e Këshillit të Evropës, në Strasburg.