Mbi 50 mijë aplikime për subvencionim të librave, ankesat nuk mungojnë

Prindërit aplikues për subvencionim për tekste shkollore kanë kaluar shifrën mbi 50 mijë por disa prindër akoma po përballen me telashe me aplikim, e ankesat, po i transmetojnë tek mësimdhënësit.

Platformës E-Kosova për subvencionim e teksteve shkollore dhe materialeve shkollore, deri në mëngjesin e së hënës, i janë drejtuar 51 mijë e 200 aplikues.

Kjo shifër, është dhënë nga zyrtarë të Ministrisë së Arsimit.

Megjithatë, mësimdhënësit janë duke u ballafaquar me ankesa nga prindërit mbi procesin.

Kështu të paktën tregon Drita Bajrami, mësimdhënëse në fshatin Shkabaj të Obiliqit, që adreson disa prej problemeve që i kanë mbërritur asaj.

“Bashkëpunimin që e kam me prindërit ne rrjete sociale, ata kanë reagime të mëdha. Nuk po i pëlqen aspak kjo metodë e re tash që ata vet ti blejnë ato libra e vazhdimisht po na shkruajnë që nuk janë të kënaqur me reformën e re. shumica e prindërve janë në punë. Po behën tollovi të mëdha nëpër librari”, ka thënë mësimdhënësja, Drita Bajrami.

Një prind i këtij fshati e hodhi në pah një tjetër problematikë për procesin e subvencionimit.

“Edhe përmes aplikimit po është vështirë se dikush nuk ka as internet, as telefon e nuk di qysh aplikojnë. Shumë vështirë është edhe për prind edhe për nxënës sivjet për libra”, u shpreh Sinan Makolli.

Forma e aplikimit është hapur nga data 25 gusht e mjetet e planifikuara nga Ministria e Arsimit do të dalin në llogaritë bankare të prindërve.

Po ashtu, shtëpitë botuese kanë publikuar çmimin e librave, i cili nuk do të ndryshojë gjatë gjithë procesit të blerjes së tyre./ Dukagjini