Masat anti-COVID, kryetarët e komunave kërkojnë heqjen e orës policore dhe hapjën e gastronomisë
Këshilli i kryetarëve në kuadër të Asociacionit të Komunave të Kosovës (AKK) sot ka mbajtur takim online. Në këtë takim është diskutuar për masat e fundit të vendosura nga Qeveria për parandalim të përhapjes së pandemisë, zbatimin e tyre dhe efektin për situatën.
“Takimin e ka hapur dhe kryesuar Kryetari i Asociacionit të Komunave të Kosovës Imri Ahmeti, i cili njoftoi Kryetarët e Komunave se ka munguar komunikimi i mirëfilltë para këtyre masave mes nivelit qendror dhe lokal. Kryetari Ahmeti tha se qëllimi i këtij takimi është vlerësimi i Komunave për masat, efektet e tyre dhe hapat e ardhshëm në këtë drejtim”, thuhet në postimin e AKK-së në facebook.
Në këtë takim kryetarët e komunave dhanë disa rekomandime:
Rekomandimet e Komunave:
- Qeveria të ketë prioritet vaksinimin e popullatës.
- Komunat kërkojnë dhe rekomandojnë heqjen e orës policore.
- Komunat rekomandojnë dhe kërkojnë që masat ndaj gastronomisë të tërhiqen dhe kërkojnë që gastronomia të zbatojë udhëzimet për distancën fizike edhe përmes tavolinave.
- Komunat kërkojnë që të amandamentohet Ligji mbi Pandeminë.
- Kërkohet nga Qeveria zbatimi i pakos së fundit të përkrahjes ekonomike dhe që të fillohet me një pako të re përkrahëse.
- Të ketë bashkëpunim dhe bashkërendim të aktiviteteve në mes nivelit qendror dhe lokal në ruajtjen e shëndetit publik dhe ekonomik.
- Bashkëpunimi në mes inspektoratit qendror dhe atij lokal nuk është në nivelin e duhur. Ky bashkëpunim duhet të fuqizohet në zbatim të masave në mënyrë që të ruhet shëndeti publik.
Masat anti-COVID të ndërmarrura nga Qeveria janë në fuqi deri më 18 prill 2021.
Masat e fundit të Qeverisë kanë pezulluar punën e gastronomisë në të gjithë vendin si dhe qytetarët kanë të drejtë lëvizje nga ora 5:00 deri në orën 22:00.
Të gjitha masat e miratuara të Qeverisë kundër COVID-19