Foto: Kallxo.com
LDK: Sot nuk ka mbledhje të Këshillit të Përgjithshëm
Lidhja Demokratike e Kosovës (LDK) e ka mohuar se sot ka mbledhje të Këshillit të Përgjithshëm të partisë.
Zëdhënësi i LDK-së, njëherësh deputet i zgjedhur, Besian Mustafa në një njoftim për media ka thënë se nuk është e vërtetë se do të mblidhet Këshilli.
“Po e shoh të raportuar në disa medie që sot mblidhet Këshilli i Përgjithshëm i LDK-së Kjo nuk është e vërtetë”, ka thënë Mustafa.
Sipas tij, ashtu siç kanë njoftuar zyrtarisht, të hënën me 6 janar, mblidhen Kryesia e LDK-së, nga ora 9:00 dhe Grupi Parlamentar nga ora 13:00.
Mbledhjet e LDK-së, pritet të mbahen në ditën kur presidenti i vendit Hashim Thaçi do ta pres në takim, kryetarin e Lëvizjes Vetëvendosje Albin Kurti, për caktimin e mandatarit për krijimin e qeverisë së re.
Takimi do të mbahet të hënën në ora 15:00.
VV-ja si parti që ka dalë e para në zgjedhje dhe LDK-ja e dyta nuk kanë arritur ende një marrëveshje koalicioni për bashkëqeverisje.
.
