Kurti: Luan Haradinaj mbajti të ndezur të vërtetën e rezistencës

Kryeministri në detyrë, Albin Kurti, përmes një shkrimi në ‘Facebook’ ka përkujtuar dëshmorin Luan Haradinaj, në përvjetorin e rënies së tij.

Kurti ka shkruar se Haradinaj është një prej themeluesve të UÇK-së dhe po ashtu një prej themeluesve të mbështetjes logjistike të ardhur prej Shqipërisë.

Kryeministri në detyrë po ashtu ka përmendur se Haradinaj gjatë luftës ishte student në Shqipëri e luftëtar në Kosovë, që sa herë vinte prej Tiranës, nuk mund të kthehej pa kryer së paku një aksion kundër forcave serbe.

Ky është shkrimi i plotë i Kurtit në kujtim të Luan Haradinaj:

Luan Haradinaj është një prej themeluesve të Ushtrisë Çlirimtare të Kosovës. Ai është po ashtu edhe një prej themeluesve të mbështetjes logjistike të ardhur prej Republikës së Shqipërisë. Luan Haradinaj me veprimtarinë e tij të armatosur kundër pushtuesit, mbajti të ndezur të vërtetën e rezistencës që përshkon popullin tonë.

Por, Luan Haradinaj është edhe figura e përkryer e viteve ’90. Student në Shqipëri dhe luftëtar në Kosovë, sa herë që vinte prej Tiranës, nuk mund të kthehej sërish atje pa kryer së paku një aksion kundër forcave pushtuese serbe. Numri i aksioneve individualë të Luanit qe tashmë dyshifror.

Ai është studenti-luftëtar që ka mbajtur gjallë dhe lavdishëm Kosovën. Ai ra dëshmor ndërsa ishte ende student; figurë e luftëtarit që mbetet përjetshëm i tillë; çereku i shekullit që përmbushet lavdishëm.

Më 6 maj 1997, Luan Haradinaj, teksa vinte prej Shqipërisë mes bashkëluftëtarëve Fehmisë, Xhevës, Abedinit dhe luftëtarëve të tjerë, ra në pritë në Qafëmullar. Dhe atë ditë u nda prej nesh. Rexhep Selimi ka dhënë përkufizimin poetik për heroin Luan Haradinaj:

Mbi ta u murose urë

pushove hapërimin

ta vigjëlosh dheun

mbi atë gur.