KQZ skanon listat e votuesve të rregullt, refuzon 4,900 pako me fletëvotime nga jashtë Kosovës

Komisioni Qendror i Zgjedhjeve (KQZ) ka njoftuar se ka përfunduar vlerësimi i pakove me fletëvotime nga votimi jashtë Kosovës për Zgjedhjet parlamentare, më 09.02.2025.

Zëdhënësi i KQZ-së, Valmir Elezi ka deklaruar se gjatë procesit të verifikimit janë refuzuar rreth 4,900 pako.

“Ne i referohemi si ‘pako të supozuara me fletëvotime’, pasi në këtë fazë nuk hapen zarfet që supozohet se përmbajnë fletëvotime. Kjo do të bëhet gjatë numërimit. Sipas të dhënave preliminar, procesit të vlerësimit apo verifikimit të pakove me fletëvotime nga jashtë Kosovës i janë nënshtruar rreth 69,000 pako, prej të cilave janë aprovuar rreth 63,000, ndërkaq janë refuzuar rreth 4,900. Arsyeja është se ato janë dërguar nga persona të cilët janë anuluar gjatë regjistrimit si votues jashtë Kosovës, u mungon dëftesa e regjistrimit, janë dërguar më shumë se një herë, kanë dërguar më shumë se një fletëvotim dhe për arsye të tjera.” – ka deklaruar Elezi, më 24.02.2025.

Elezi tha se këto shifra janë të dhëna preliminare dhe se në procesin e numërimit do të ofrohen “shifra plotësisht të sakta”.

“Pra, këto janë vetëm të dhëna preliminare dhe në procesin e numërimit do të kemi shifrat plotësisht të sakta. Procesi i vlerësimit përfshin verifikimin nëse pakot e dërguara u takojnë votuesve të regjistruar dhe nëse janë ndjekur procedurat e tjera të parapara.” – shtoi ai.

Tutje, Elezi tha se KQZ-ja po bën, gjithashtu, skanimin e listës së votuesve nga 2,533 vendvotimet e rregullta në Kosovë, në të cilën nënshkruhen votuesit të cilët marrin pjesë në votim.

Sipas tij, skanimi i listës së votuesve të vendvotimeve të rregullta është i domosdoshëm para se të fillohet me numërimin e votave nga vendvotimet me kusht, për t’u siguruar se “askush nuk ka votuar dy herë: në vendvotimin e rregullt dhe në vendvotimin me kusht”.

Elezi bëri të ditur se pasi të përfundojnë këto procese, do të mund të fillojë numërimi i votave me kusht, votave të personave me nevoja të veçanta dhe votave nga votimi jashtë Kosovës.

Mbrëmjen e 21 shkurtit 2025 është përmbyllur procesi i numërimit të votave të kandidatëve për deputetë dhe verifikimit të votave të subjekteve politike nga Formularët e plotësuar në vendvotime, më 09.02.2025

Kështu bëri të ditur KQZ-ja përmes një njoftimi, përmes të cilit tha se në 38 Qendrat Komunale të Numërimit KQZ-ja ka ofruar transparencë të plotë të procesit të numërimit, duke prezantuar në ekrane punën e çdo ekipi të numërimit – përfshirë pamjen e fletëvotimeve të plotësuara në vendvotime nga votuesit dhe krijimin e Formularëve digjital.

Në bazë të rezultateve të fundit preliminare të përditësuara në orën 10:27, më 20.02.2025, në uebfaqen e KQZ-së, Lëvizja Vetëvendosje (LVV) është e para me 40.80%, apo 342,254 vota.

Partia e dytë me më së shumti vota është Partia Demokratike e Kosovës (PDK) me 22.05% e votave, apo 184,936 vota.

E treta është renditur Lidhja Demokratike e Kosovës (LDK) me 17.64%, apo 147,928 vota.

Në këto rezultate nuk përfshihen: votat me kusht, votat e personave me nevoja të veçanta dhe votat nga votimi jashtë Kosovës.

KQZ-ja ka njoftuar se pas numërimit të votave të kandidatëve për deputetë dhe verifikimit të rezultateve të subjekteve politike nga Formularët e rezultateve të plotësuar në vendvotime – proces i cili është zhvilluar dhe po vazhdon në Qendrat Komunale të Numërimit – në platformën elektronike https://rezultatet2025.net janë publikuar rezultatet për subjektet politike dhe kandidatët për deputetë.

Zgjedhjet parlamentare janë mbajtur më 09.02.2025. Këto janë Zgjedhjet e para të rregullta që Kosova i ka mbajtur që nga shpallja e pavarësisë, më 2008.