Ilustrim
Iu gjetën 27 mijë euro të murosura në një depo, arrestohet një person (FOTO)
Policia e Kosovës ka njoftuar se ka arrestuar një 25-vjeçar pasi të njëjtit i janë gjetur 27 mijë euro të murosura në një depo.
Kontrolli i Policisë së Kosovës ka ardhur pasi një grua më 21 shtator kishte raportuar se i mungonte një çantë me dokumente personale dhe para të gatshme në vlerë 18 mijë euro. Ajo dyshonte se e kishte harruar në një taksi me të cilin kishte udhëtuar për në Fushë Kosovë.
Disa ditë pas raportimit, hetuesit policorë e kanë identifikuar personin e dyshuar dhe sot rreth orës 19:00 kanë arritur ta arrestojnë.
Pjesë e veprimeve policore ka qenë edhe kontrolli i vendbanimit të personit të dyshuar ku edhe i kanë gjetur 27 mijë euro të murosura në një depo.
25-vjeçari A.R., pas përfundimit të procedurave të nevojshme policore, me vendim të prokurorit është dërguar në mbajtje.Po ashtu, Policia e Kosovës ka njoftuar se palës së dëmtuar i është kthyer shuma e saj e parave.