Incidenti në Mitrovicë, njëri nga të dyshuarit paraqitet në Polici

Një incident me të shtëna me armë dhe rrahje dyshohet se ka ndodhur në Mitrovicë të Jugut më 03.04.2025, rreth orës 21:00.

KALLXO.com ka siguruar pamje të incidentit dhe ka marrë deklaratat e dy personave që shihen në këto pamje.

Në pamjet e kamerave të një dyqani shihen se si tre persona e sulmojnë viktimën Xh.F., i cili ishte futur në dyqan për të shpëtuar nga të dyshuarit.

Xh.F. ka treguar se ka qenë duke shëtitur me shokë kur ka parë disa persona me vetura dhe njëri, sipas tij, ka nxjerrë një armë dhe ka gjuajtur në ajër.

Ai tha se kur i kanë parë ata kanë ikur dhe ky është futur në dyqan, ku tre të dyshuarit e kanë sulmuar me grushte dhe njëri e mbante pistoletën në dorë.

E pronari i lokalit, H.G. në një prononcim për KALLXO.com ka treguar për përpjekjet e tij për t’i larguar të dyshuarit nga lokali i tij.

Ndërsa, KALLXO.com merr vesh se njëri prej të dyshuarve për incidentin e të enjtes në mbrëmje është paraqitur në Polici.