Gjykimi ndaj të akuzuarit për krime lufte, dëshmitari rrëfen momentet si ishte rrahur nga tre persona
Në seancën e së mërkures, më 26.03.2025, ndaj Çaslav Joliq, i akuzuar për “krime lufte”, të kryera në zonën e Istogut, ka dhënë dëshminë dëshmitari Nexhmedin Curraj.
Edhe në Rigjykim, më 05.02.2025, i akuzuari Çaslav Joliq kishte deklaruar se nuk e pranon fajësinë për akuzat që i vihen në barrë.
Dëshmitari Nexhmedin Curraj deklaroi se atë kohë ka punuar si taksist dhe më 15 mars 1998 i akuzuari Joliq bashkë më një person të quajtur Llaza kishin hipur në veturën e tij dhe i kishin kërkuar që t’i dërgojë në një lokacion.
Tutje, dëshmitari Curraj tha se kur ishin ndaluar te një dyqan, një person i quajtur me emrin Rade Pituliq i kishte nxitur të akuzuarin Joliq dhe Llaze që ta rrahin dëshmitarin.
“Ka ardhë Rade Pituliq, ka qenë polic dhe iu ka thënë ‘Qysh po eni me këtë irredentist?’, i ka nxitur, sepse besoj se këta nuk më kishin rrahur, sepse i kam njohur të dy.” – tha dëshmitari Curraj.
Tutje, dëshmitari Curraj tha se kur ishin ndalur afër një shitoreje, personi me emrin Rade e kishte hapur derën e veturës dhe e kishte goditur bashkë me të akuzuarin Joliq dhe Llaza.
“Pastaj, Rade ka ardhë kah dera jeme, ku i pari që më ka goditur ka qenë Rade dhe që i ka nxitur këta të dy. Pastaj, këta të dy kanë hy brenda në kerr dhe kanë fillu të më godasin. Rade ka qëndruar jashtë veturës. Ma ka hapur derën e veturës dhe ka goditur nga jashtë, ndërsa brenda në veturë kanë hipur Llaza dhe Çaslavi, përpara ka qenë Llaza, ndërsa Çaslavi mbrapa.” – tha dëshmitari Curraj.
Tutje, dëshmitari Curraj deklaroi se kur e ishin dërguar në një kafene, për ta pastruar fytyrën nga gjaku disa persona të cilët kishin qenë prezent i kishin thënë dëshmitarit që të ikte, të largohet.
“Unë isha i përgjakur, dhëmbët i kisha të thyer dhe më kanë çuar aty për me më la dhe në atë moment kur kam hy në kafiq, aty më ka ndihmu Zoti, se ata dolën në atë moment dhe disa serbë që ishin në lokal, që më kanë njohur më kanë thënë “Ik shpejt”. E, kam dalë me ik te vetura që ishte rreth 300 metra larg.” – deklaroi dëshmitari Curraj.
Dëshmitari Curraj tha se gjatë largimit të tij nga kafiteria e kishte parë ngjarjen kur kishte qenë duke u rrahur dëshmitari Naim Ferati.
Tutje, dëshmitari Curraj tha se gjatë kohës sa kishte qenë duke u tërhequr zvarrë nga vetura për në kafiteri i akuzuari Joliq, Llaza dhe Rade i ishin drejtuar me disa fjalë.
“Rugës gjatë së cilës më kanë tërheqë zvarrë, Rade më është drejtuar me fjalët: ‘Tjetër herë kur takohemi nuk ke me ekzistu më, sepse kemi me të vra’, ndërsa Çaslavi me Llazen ka thënë: ‘Këtu nuk është Kosova, po është Serbia këtu, nuk sundon Ibrahim Rugova, por Millosheviqi.’” – tha dëshmitari Curraj.
Mbrojtësi i të akuzuarit Joliq, avokati Miodrag Brkljaq pyeti dëshmitarin Curraj se pse në dëshminë e dhënë të tij në Prokurori kishte deklaruar që nuk e njihte të akuzuarin.
“Nuk është e vërtetë që nuk e njoh njeriun. Edhe në Prokurori kam deklaruar kështu, por çka ka shkruar Prokurori unë nuk e di. E vërteta është ajo që po e them këtu. E kam ditë prej fillimit që janë Llaza dhe Joliq, dhe Radi.” – u përgjigj dëshmitari Curraj.
Trupi Gjykues ka refuzuar propozimin e prokurorit Morina për t’u dëgjuar në cilësinë e dëshmitares, ekspertja Selvije Izeti.
Tutje, Trupi Gjykues refuzoi edhe propozimet e Mbrojtjes që në cilësi të dëshmitarëve të dëgjohen dëshmitarja Sanja Matkoviq dhe dëshmitarët, Zoran Joliq dhe Vuqko Peqinoviq.
Seanca e radhës për këtë çështje penale është caktuar për në muajin maj 2025.
Trupi Gjykues në këtë çështje penale është i përbërë nga Ngadhnjim Arrni (Kryetar), Arben Hoti dhe Lutfi Shala (anëtarë).
Joliq, më 10.06.2024, ishte dënuar nga Gjykata e Prishtinës me dënim me burgim në kohëzgjatje prej 8 vjetësh, në bazë të Ligjit Penal të ish-RSFJ-së.
Çka thotë Dosja e Prokurorisë?
Sipas Dosjes së Prokurorisë Speciale të Kosovës, të siguruar nga KALLXO.com, në vitin 1998, në lagjen “Bllagaq” të fshatit Gurakoc, ishte rrëzuar një helikopter i forcave serbe dhe për këtë arsye i dëmtuari Z.M. po i shoqëronte për te vendi i ngjarjes dy gazetarë: njëri anglez e tjetri belg, së bashku me një përkthyese shqiptare.
Me të arritur te vendi i ngjarjes nga shtëpia e Rosa Pejoçinoviqit dalin pesë persona të veshur me uniformë të Policisë serbe: Radule (Dule) Pejoçinoviq, Çaslav Joliq, Darko Pejoçinoviq, Millosh Joliq dhe një person tjetër i paidentifikuar. Të njëjtit akuzojnë të dëmtuarin Z.M., se pse i kishte sjellë gazetarët në vendin e ngjarjes. Pas këtyre akuzave të lartcekurit e sulmojnë fizikisht dhe dy prej policëve e kapin për krahu dhe në prezencë të gazetarëve kishin filluar ta godisnin me grushte dhe shqelma për një periudhë prej 20 minutave, derisa në një moment personi me nofkën “Dule” e kishte goditur me boks në kokë të dëmtuarin, me ç’rast Z.M. kishte humbur vetëdijen dhe ishte rrëzuar në tokë – duke i shkaktuar lëndime të rënda trupore.
Sipas Dosjes së Prokurorisë, më 15 mars të vitit 1998, derisa i dëmtuari tjetër N.F. po pinte kafe në restorantin “Shija” në Gurakoc, i shoqëruar nga disa persona, në lokal kishin shkuar 5 policë serbë dhe duke e kapur për qafe e kishin tërhequr zvarrë jashtë lokalit. Pastaj, të gjithë fillojnë ta sulmojnë fizikisht duke e goditur në pjesë të ndryshme të trupit.
Sipas Aktakuzës, polici me emrin Rade Pituliq e kishte goditur me tytë të automatikut disa herë në kokë – duke ia mbuluar tërë trupin në gjak dhe duke e tërhequr zvarrë e kishin dërguar në Stacion të Policisë në Gurakoc.
Tutje, në Dosje thuhet se duke e dërguar në Stacion të dëmtuarin e njoftojnë se do ta ekzekutojnë.
Ndërsa, më 28 mars të po të njëjtit vit të dëmtuarin e kishin detyruar që ta lëshojë shtëpinë si çdo banor tjetër i fshatit.
Të gjitha raportimet e tjera, lidhur me këtë çështje, mund t’i gjeni në këtë: LINK.
Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.
Ish-presidenti i Jugosllavisë, Sllobodan Millosheviq ishte akuzuar për “krime lufte” dhe për “krime kundër njerëzimit”, të kryera nga forcat serbe e jugosllave në Kosovë. Millosheviq ishte akuzuar për “krime lufte” dhe “krime kundër njerëzimit”, të kryera edhe në luftërat në Bosnjë dhe Hercegovinë, si dhe në Kroaci.
Gjykimi i tij në Gjykatën Ndërkombëtare Penale për ish-Jugosllavinë (ICTY), me seli në Hagë, nuk kishte marrë epilog, pasi Millosheviq kishte vdekur më 11.03.2006 në qeli, teksa po mbahej në paraburgim.
Millan Millutinoviq, ish-Kryetari i Serbisë, ishte liruar nga akuzat për “krime lufte” gjatë konfliktit në Kosovë.
Nikolla Shainoviq, Zëvendëskryeministër i Republikës Federale të Jugosllavisë, ishte dënuar me 18 vjet burg për “krime kundër njerëzimit” dhe “shkelje të ligjeve apo zakoneve të luftës”.
Dragolub Ojdaniq, ish-Shefi i Shtabit të Përgjithshëm të Ushtrisë jugosllave, ishte dënuar me 15 vjet burg për “krime kundër njerëzimit”.
Nebojsha Pavkoviq, ish-Komandanti i Armatës së Tretë të Ushtrisë jugosllave, ishte dënuar me 22 vjet burg për “krime kundër njerëzimit” dhe “shkelje të ligjeve apo zakoneve të luftës”.
Vlladimir Llazareviq, ish-Komandanti i Korpusit të Prishtinës të Ushtrisë jugosllave, ishte dënuar me 14 vjet burg për “krime kundër njerëzimit”.
