Detaje se si prizrenasi kanosi nënën e tij me sëpatë pasi nuk i dha para

Gjykata Themelore në Prizren ka aprovuar kërkesën e Prokurorisë Themelore në Prizren për caktimin e masës së paraburgimit për të pandehurin E. F., nën dyshimet se ka kanosur nënën e tij.

Sipas njoftimit të Gjykatës në Prizren, të pandehurit i është caktuar një muaj paraburgim.

Gjykata në Prizren ka bërë të ditur se i pandehuri gjatë kohës sa ishte në shtëpi, kishte një mosmarrëveshje me nënën e tij.

Sipas njoftimit, i pandehuri  kishte kërkuar para nga nëna e tij, dhe e njëjta nuk kishte para për t`i dhënë, e më pas i pandehuri pas revoltës kishte marrë sëpatën dhe kishte kanosur nënën e tij duke i shkaktuar frikë dhe pasiguri.

“Caktimi i masës së paraburgimit në këtë fazë sipas Gjykatës Themelore të Prizrenit është i bazuar në ligj dhe i arsyeshëm dhe se do të siguroi zhvillimin e papenguar të rrjedhës së procedurës hetimore dhe sigurimin e prezencës së të pandehurit, duke pasur parasysh edhe rrethanat se raportet e të pandehurit me të dëmtuarën janë të acaruara, këto për Gjykatën tregojnë rrezikun se me lënien në liri të të pandehurit ekziston rreziku i përsëritjes së veprës së njëjtë penale”, thuhet në njoftim.