Britanikët tërhiqen nga mbështetja e rekrutimit për Komisionerin për Privatësi

Ambasada e Britanisë në Kosovë ka shprehur zhgënjimin e saj për dështimin e Kuvendit që të emërojë Komisarin e Agjencisë për Informim dhe Privatësi.

Sipas tyre dështimi i 14 gushtit e vë në dyshim zotimin e partive politike për zbatim të memorandumit të Mirëkuptimit me Ambasadën Britanike.

“Kemi ndjekur me zhgënjim dështimin e Kuvendit të Republikës së Kosovës që të emërojë Komisarin e Agjencisë për Informim dhe Privatësi më 14 gusht. Procesi transparent dhe meritor, i mbështetur nga projekti ynë i rekrutimit, kishte nxjerrë dy kandidatë të përshtatshëm”, thuhet në reagim.

Sipas tyre ‘mos emërimi i asnjërit prej tyre vë në dyshim zotimin e deklaruar të partive politike për të zbatuar Memorandumin e Mirëkuptimit me Ambasadën Britanike, por ç’është më e rëndësishmja, dërgon sinjal negativ për profesionistët e pavarur në Kosovë dhe shpresat e tyre për të kontribuuar në Institucionet e Kosovës’.

Tutje në reagimin e tyre britanikët kanë theksuar se ‘çdo emërim publik do të duhej të merrte parasysh vetëm interesat e vendit dhe të qytetarëve të tij, dhe jo interesin e ngushtë partiak’.

Në njoftimin e saj, ambasada e Britanisë ka njoftuar që tentativa e 4-të për emërimin e komisionarit nuk do të ketë mbështetjen e tyre në kuadër të procesit të rekrutimit.

“Dështimi i Kuvendit për të emëruar Komisarin e Agjencisë për Informim dhe Privatësi do t’i lërë qytetarët kosovarë pa mbrojtje të duhur institucionale të privatësisë dhe të dhënave. Kjo gjithashtu do të çojë në përsëritje të procesit të rekrutimit për herë të katërt dhe vonesë të fondeve të BE-së për Agjencinë. Procesi i radhës nuk do të mbështetet nga projekti ynë i rekrutimit. Ne nuk do të çojmë poshtë paratë e tatimpaguesve britanikë në proceset e përsëritura që ishin transparente dhe të zhvilluara me rregull, dhe që nxorën kandidatë që i plotësojnë kushtet për emërim”, thuhet tutje në reagim.

Mirëpo në njoftim, britanikët kanë theksuar se do të vazhdojnë të monitorojnë procese të tjera të mbetura të rekrutimit.

“Ne do të vazhdojmë t’i monitorojmë votat e partive politike në Kuvend për pozitat që kanë mbetur në Listën e Pozitave të dakorduara të projektit (shih ëëë.kosovoselection.org), në mënyrë që të vlerësojmë angazhimin tonë me Kuvendin për rekrutim të pavarur, transparent dhe llogaridhënës për pozitat e larta publike”, thuhet tutje aty.

Të premten, as pas dy raundesh votimi Kuvendi nuk arriti të zgjidhë Komisionerin e Agjencisë për Informim dhe Privatësi, për të cilën pozitë në garë ishin tre kandidatë. Asnjëri nga ta nuk arriti të marrë votat e nevojshme, prej 61 syresh.