Foto të policve shqitarë në terren pas tërmetit në Shqipëri, Foto: Policia e Shtetit
Angazhohen rreth 2 mijë policë pas tërmetit në Shqipëri
Orët e para të mëngjesit të sotëm, Shqipëria është goditur nga një tërmet i fuqishëm.
Deri më tani gjashtë persona është konfirmuar se kanë vdekur pasi janë zënë nga rrethojat e ndërtesave pas tërmetit.
Policia e Shtetit ka njoftuar se deri më tani janë angazhuar deri në 1 mijë e 900 policë në terren pas tërmetit.
“Rreth 1900 forca policie janë të angazhuara në terren, për t’u ardhur në ndihmë banorëve të prekur nga tërmeti. Deri në këto momente u është dhënë ndihmë mbi 260 qytetarëve”, thuhet në njoftimin e Policisë së Shtetit.
Policia ka kërkuar nga qytetarët që të kufizojnë lëvizjet me automjetet e tyre pasi që duhet të u japin mundësi autoriteteve, ambulancave të qarkullojnë lirshëm nëpër rrugë.
“Policia e Shtetit u kërkon gjithë qytetarëve të Durrësit dhe rrethinave të kufizojnë në maksimum lëvizjet me mjetet e tyre, për t’u dhënë mundësi autoriteteve, ambulancave dhe shërbimeve të emergjencave civile të qarkullojnë lirshëm në rrugë, për t’u ofruar ndihmën e nevojshme banorëve të lënduar nga pasojat e tërmetit të mëngjesit të sotëm. Gjithashtu apelojmë banorët të qëndrojnë larg godinave të dëmtuara dhe të mos pengojnë ndërhyrjet e misioneve të shpëtimit në terren”, thuhet tutje në njoftim të policisë.
Gjithashtu policia ka thënë se për çdo ndihmë mund të telefononi në 112.