Agjencia e Barnave urdhëron largimin e ilaçit 'Ranitidinë' nga barnatoret dhe spitalet në Kosovë

Agjencia e Kosovës për Produkte dhe Pajisje Medicinale ka urdhëruar largimin nga tregu të produktit medicinal “Ranitidinë” për shkak se përmban substanca kancerogjene.

Ky vendim i AKPPM-së, ka ardhur duke u bazuar në rekomandimet e Komisionit Evropian përkatësisht Komitetit për Barna për Përdorim Human (CHMP) nga EMA (Agjencia Evropiane e Barnave), se ky ilaç përmban substancë kancerogjene të quajtur N-nitrosodimetilaminë (NDMA).

“Të dhënat në dispozicion për sigurinë NUK TREGOJNË se Ranitidina rrit rrezikun e kancerit dhe çdo rrezik i mundshëm ka të ngjarë të jetë shumë i ultë. Megjithatë, NDMA është gjetur në disa barna Ranitidinë me nivele në rritje e vërejtur gjatë jetëgjatësisë së saj. Në bazë të këtij vendimi produkti duhet të tërhiqet nga të gjitha institucionet shëndetësore (barnatore, spitale etj) dhe nuk duhet të vihet në dispozicion të pacientëve apo tu administrohet atyre”, thuhet në njoftimin e AKPPM-së.

“Ranitidina” përdoret për reduktimin e acidit në lukth te pacientët me sëmundje të tilla si urthi dhe ulçera e lukthit.

Alternativat janë në dispozicion dhe pacientët duhet të kontaktojnë me profesionistët e tyre të kujdesit shëndetësor për këshilla se cilin bar duhet ta përdorin.