Punimet në rrugën "Rexhep Luci" në kryeqytet, në vendpunishte shpërthen gypi i ujit

Një gyp ka shpërthyer gjatë punimeve në rrugën “Rexhep Luci” në kryeqytet, derisa kompania e kontraktuar po punon për sanimin e gjendjes.

Punimet për rigjenerim të rrugës “Rexhep Luci” dhe mbylljes së saj për makina nisën në nëntor 2024, derisa punimet pritej të zgjasnin 120 ditë.

“Kjo rrugë do të bëhet një hapësirë më e sigurt dhe më funksionale, me përdorimin e materialeve prej guri, më shumë drunj dhe një lidhje të re me pjesën e sipërme të qytetit”- kishte shkruar kryetari Përparim Rama në nisjen e këtyre punimeve.

Qëllimi i këtij projekti është shndërrimi i rrugës në hapësirë publike dhe mbyllja e qarkullimit për makina.

“Mbyllja e rrugës për veturat do ta bëjë më të sigurt për këmbësorët të ecin dhe të shijojnë këtë zonë pa stresin e trafikut. Më shumë hapësira të gjelbëra: Do të shtojmë zonën e gjelbërimit për të kënaqur të gjithë këmbësorët dhe ata që dëshirojnë të relaksohen në këtë zone”- ishte shprehur Rama.

Sipas Komunës, për 120 ditë pritet të përfundonin punimet e nisura në nëntor 2024.

“Faza e parë përfshinë punimet për pjesën nëntokësore e më pas fillon rregullimi dhe gjelbërimi i hapësirës”- bëri të ditur Komuna.

Komuna e Prishtinës publikoi planin për rigjenerim të kësaj rruge në shtator 2023.