Foto: Urim Krasniqi/KALLXO.com

Neuropsikiatri Blyta: Jemi në këtë gjendje sepse na mungon ndërgjegjja kolektive

Neuropsikiatri Afrim Blyta ka thënë se jemi në këtë gjendje si popull për shkak se na mungon ndërgjegjja kolektive.

Blyta në emisionin “Kallxo Përnime” tha se rezultat i kësaj gjendjeje është kultura shekullore prej së cilës jemi qeverisur.

“Jemi këtu ku jemi për shkak se jemi grup i individëve të pakoordinuar, për arsye se nuk ekziston diçka që quhet ndërgjegje kolektive dhe ky është rezultat i një kulture shekullore që na udhëheq. Për ne është shumë me rëndësi përemri pronor ‘E imja’, tek ne nuk ekziston ‘E jona’. Ne po e shohim situatën e pandemisë, e dimë të gjithë se vendosja e maskave është në interes të secilit prej nesh, por ne nuk e vendosim atë. Një gjë e tillë, në popujt që kanë ndërgjegje kolektive, nuk ekziston,” ka thënë Blyta.

Tutje Blyta shtoi se tek popujt me sjelle të tilla nevojitet një lider i cili na tregon si të ecim, por bashkëdyzimi i një lideri të pamoralshëm dhe qytetarit të pandërgjegjshëm na ka sjellë në këtë situatë.

“Meqenëse jemi individualistë dhe nuk e kemi atë që quhet ndërgjegje kolektive, neve na duhet një lider, i cili na tregon si duhet të ecim. Po ta kemi një lider të moralshëm, qytetari kështu si është, bëhet i ndershëm, por nëse lideri është i pamoralshëm, njëjtë do e kemi edhe qytetarin. Ky bashkëdyzim i qytetarit të pandërgjegjshëm dhe liderit të pamoralshëm na ka sjellë në këtë situatë,” ka shtuar tutje Blyta.