ILUSTRIM Të burgosur në Burgun e Dubravës - Foto: KALLXO.com
Plani për rritjen e sigurisë në burgjet e Kosovës përfshinë 200 gardianë
200 gardianë të burgjeve të Kosovës janë të përfshirë në një plan i cili ka për qëllim rritjen e sigurisë nëpër burgje, luftimin e favorizimeve si dhe eliminimin e dukurive negative brenda burgjeve.
Kështu ka thënë për KALLXO.com, zëdhënësi i Shërbimit Korrektues të Kosovës, Florent Gashi.
Gashi ka shpjeguar se rrotacioni i brendshëm i gardianëve të Shërbimit Korrektues të Kosovës do të bëhet në mënyrë që gardianët të kalojnë dhe të bëjnë roje e të mbajnë rendin në nëntë burgje, në këtë mënyrë të njëjtit do t`u ikin favorizimeve të të burgosurve.
“Rrotacioni do të zhvillohet kështu, për shembull, një gardian që ka qenë duke mbajtur rendin dhe ligjin në burgun e Dubravës ka kaluar në Burgun e Sigurisë së Lartë dhe të njëjtin shembull e ke edhe me të gjithë gardianët e tjerë”, shpjegoi Gashi për KALLXO.com.
Sipas zëdhënësit Gashi ky ndryshim ka qenë i nevojshëm.
“Pas një kohe të gjatë analizash dhe diskutimesh kemi ardhur në përfundim se një rrotacion i brendshëm, i zyrtarëve korrektues nga një institucion në institucionin tjetër ka qenë i nevojshëm. Ky rrotacion bëhet vetëm për zyrtarët korrektues, të cilët mbajnë rendin dhe ligjin në institucionet korrektuese”, ka thënë Gashi për KALLXO.com.
Një plan i tillë ishte ekzekutuar edhe me disa drejtorë të burgjeve.
“Sa ju përket drejtorëve të burgjeve, ne muaj me herët kemi bërë një rrotacion të ngjashëm edhe me drejtorët, veprim ky i cili ka rezultuar i suksesshëm”, shtoi Gashi.
Madje këtë plan të veprimit SHKK tani po e quan të domosdoshëm.
KALLXO.com, shumë herë kishte raportuar për favorizimet e keqpërdorimet në burgjet e Kosovës.
Dhjetëra gardianë të burgjeve të Kosovës janë suspenduar dhe arrestuar si pasojë e arratisjeve të të dënuarve e të paraburgosurve si dhe favorizimeve ndaj të burgosurve.
Në nëntor të vitit të kaluar, KALLXO.com kishe raportuar se si një gardian dhe një zyrtar i Ministrisë së Diasporës ishin arrestuar nën dyshimin se kishin bërë pazare për arratisjen nga Burgu i Sigurisë së Lartë i malazezit Mario Millosheviq.
Një zyrtar i Ministrisë së Diasporës, dyshohet se i kishte dhënë 3 mijë euro një gardiani të Shërbimit Korrektues të Kosovës në Burgun e Sigurisë së Lartë, si ryshfet për ta liruar një shtetas të Malit të Zi, të arrestuar muaj më parë nga Policia e Kosovës.
Dy gardianë ishin suspenduar dhe arrestuar edhe në maj të këtij viti. Kjo për arsye se një i paraburgosur ishte arratisur deri sa ishte nën mbikëqyrjen e tyre.
Madje shumë herë, burgu i Dubravës ka qenë cak i bastisjeve nga policia pasi në të njëjtin vend dyshohej se hynin gjëra të ndaluara siç janë telefona e drogë.
Në maj të vitit të kaluar një bastisje ishte kryer në po të njëjtin burg, dhe policia kishte arritur të konfiskoj telefona e tableta të dyshimta.
Bastisje në burgun e Dubravës, konfiskohen telefona e tableta të dyshimta
Suspendime për Ikjen e të Paraburgosurit
.