Ukrainasit bashkohen rreth Presidentit pasi Trump po "mundohet ta denigrojë"

Disa ditë para përvjetorit të tretë të pushtimit të plotë të Rusisë, ukrainasit sa janë të mërzitur, po aq edhe të tensionuar sikur të ishin ditët para se Moska ta niste luftën. Vetëm se tani ata nuk janë të shqetësuar vetëm për armikun e tyre të kahershëm – shkruan Agjencia amerikane e lajmeve AP.

Kërcënimi i ri i papritur i Ukrainës nuk vjen prej aleates dikur më të madhes dhe më të vendosurës, SHBA-së, përkrahja e së cilës duket se po zbehet derisa presidenti Donald Trump po i jep zë propagandës së presidentit rus, Vladimir Putin, duke u zotuar njëherësh se do t’i japë fund luftës ndërmjet dy vendeve. 

“Nuk është President i përsosur, por nuk është diktator”

Pas tronditjes fillestare kundrejt pretendimeve të rreme të Trumpit këtë javë se Ukraina po prihet prej një “diktatori”, i cili e nisi luftën me Rusinë, populli ukrainas po mbështet Presidentin e tyre të sfiduar, Volodymyr Zelensky, i cili e ka kritikuar publikishit Trumpin për promovimin e “dezinformatave” ruse.

“Po, ai nuk është President i përsosur, por nuk është diktator.” – ka thënë Kateryna Karaush, një punëtore 25 vjeçe e teknologjisë nga Kievi, që si shumë ukrainas – madje edhe si disa republikanë në Kongres – po e ka të vështirë ta kuptojë qasjen e Trumpit ndaj Rusisë, që përfaqëson thelbin e politikës së jashtme amerikane.

Por, pas tre vjetësh të luftës, civilët dhe ushtarët janë lodhur me shpirt. Qindra-mijëra janë vrarë ose plagosur, dhjetëra-mijëra konsiderohen të zhdukur dhe miliona të tjerë janë larguar nga vendi.

Humori ka nisur të zymtohet edhe më shumë në ditët e fundit kur Trumpi sinjalizoi dëshirën e tij për t’i dhënë fund shpejt e shpejt luftës sipas kushteve, që Zelensky dhe të tjerët mendojnë se janë në favor të Rusisë.

Pasi Trumpi e quajti Zelenskyn “diktator” – pse ligjërisht i shtyu Zgjedhjet vjet – dhe derisa dolën raportet se zyrtarët amerikanë dhe rusë po takoheshin në Arabinë Saudite që të diskutonin Marrëveshjen e mundshme të armëpushimit pa pjesëmarrjen ukrainase në tryezë, edhe kritikët më të ashpër vendas të Zelenskyt nisën ta mbronin Presidentin e tyre.

“Ne mund të kemi opinione të ndryshme për Zelenskyyn, por vetëm qytetarët ukrainas kanë të drejtë të gjykojnë përkrahjen e tij.” – ka deklaruar Yaroslav Zhelezniak, deputet nga partia opozitare Holos. “Dhe, ta kritikosh publikisht atë, fundja ai është lideri ynë”.

Fjalët e serta të Trumpit për Zelenskyn kanë shkaktuar kritika në mesin e demokratëve dhe të disa republikanëve në Kongresin amerikan, ku mbrojtjen e Ukrainës nga Rusia – me miliarda dollarë ndihma ushtarake – kishte siguruar mbështetja bipartizane. Por, zëvendëspresidenti JD Vance e qortoi publikisht Zelenskyn për paralajmërimin publik se Trumpi ka rënë nën ndikimin e fushatës dezinformuese të Rusisë.

Të enjten, tensionet në ngritje bënë që të anulohej një Konferencë për media, që ishte planifikuar për të pasuar bisedimet ndërmjet Zelenskyt dhe Emisarit të Trumpit për Ukrainën për dhënien fund luftës.

Rezultatet e një sondazhi të publikuar të mërkurën prej Institutit Ndërkombëtare të Sociologjisë në Kiev treguan se mbështetja publike për Zelenskyn kishte shkuar në 57%. Sondazhi ishte kryer ndërmjet 4 dhe 9 shkurtit, me pjesëmarrje të 1000 personave të cilët jetojnë në pjesë të ndryshme të Ukrainës, të kontrolluara nga Qeveria vendase.

“Ne kemi një President, që ne e përkrahim. Gjatë luftës, jemi të bashkuar.” – ka thënë Larysa, 52-vjeçare e cila jeton në qytetin verilindor Kharkiv. Ajo ka refuzuar ta tregojë mbiemrin për shkaqe sigurie.

Përplasja politike me Shtetet e Bashkuara vjen në kohën kur forcat ukrainase, me më pak luftëtarë se rusët dhe pa armatim në raport me ta, po kanë telashe që të frenojnë avancimet e ngadalshme, por stabile të Ushtrisë ruse.

“Do të luftojmë edhe me lopata”

Duke folur nga vijat e frontit, disa ushtarë ukrainas kanë thënë se nuk i ka kapluar paniku dhe se nuk janë të gatshëm të heqin dorë prej luftës.

“Edhe nëse nuk kemi mjaftueshëm armatim, ose nëse ndalen fondet, kjo nuk e ndryshon obligimin tonë për të luftuar.” – ka thënë një oficer ushtarak ukrainas, i cili ka folur në kushte anonimiteti në pajtim me rregullat e Ushtrisë. “Nuk ka predha? Do t’i rrokim armët. Nuk ka armë? Do të luftojmë me lopata”.

Të mërkurën, presidenti Trump ka folur për njërën prej pikave për të cilat flet më së shpeshti Putin, duke pretenduar se Zelensky, mandati i tij të cilit skadoi vjet, duhet të mbajë Zgjedhje. Por, ideja ka gjetur pak mirkëuptim brenda Ukrainës. Madje, edhe në mesin e politikanëve opozitarë, të cilët ia kanë njohur të drejtën Zelenskyt për shtyrjen e datë së Zgjedhjeve për shkak të luftës.

“Zgjedhjet nuk na duhen tani, sepse duhet të mbahen vetëm kur të kuptojmë Kornizën e Marrëveshjes (një marrëveshjeje paqësore) me Rusinë.” – ka deklaruar Volodymyr Ariev, deputet nga partia opozitare “Solidariteti Europian”. “Prej mbajtjes së Zgjedhjeve tani do të përfitonte vetëm Kremlini, duke përçarë më tej ukrainasit dhe duke instaluar një President të ri, i cili mund të nënshkruajë Marrëveshje të favorshme për Moskën”.

Këshilltari i Zelenskyt, Mykhailo Podolyak dha një arsye shtesë për shtyrjen e Zgjedhjeve derisa të mos arrihet paqja: Rusia mund të mundohet të ndërhyjë në një proces zgjedhor, që tashmë do të përballet me sfida të rëndësishme.

Miliona ukrainas të zhvendosur të cilët jetojnë jashtë vendit do të luftonin për të marrë pjesë – pa përmendur qindra-mijëra ukrainas të cilët jetojnë në territoret e pushtuara nga Rusia, mundësia e të cilëve për të votuar do të ishte praktikisht e pamundur.

Rreth 800,000 ukrainas po shërbejnë aktualisht në forcat e armatosura, që ua vështirëson mundësinë që të votojnë, pa e dobësuar Ushtrinë. Dhe, ata të cilët luftojnë nuk do të jenë në gjendje të kandidojnë për poste publike – një e drejtë e garantuar me Ligjin ukrainas.

“Mbajtja e Zgjedhjeve para nënshkrimit të një Marrëveshjeje paqeje me garanci sigurie do të ishte shkatërruese për Ukrainën.” – ka thënë Valerii Pekar, profesor në shkollën e biznesit, Kyiv-Mohyla. “SHBA-ja dhe Rusia tani janë bërë bashkë në promovimin e idesë ‘Së pari Zgjedhje, pastaj paqe’ – që është mënyra më e shpejtë dhe më e lirë për ta gjunjëzuar Ukrainën.”

Përgatiti: Rexhep Maloku – Kallxo.com