Shpërthimi i COVID-19 bllokon mbi 80 mijë turistë në Sanya të Kinës

Më shumë se 80,000 turistë kanë mbetur të bllokuar në një vendpushim popullor në Kinë pas një shpërthimi të koronavirusit, raporton BBC.

Autoritetet anuluan të shtunën të gjitha fluturimet dhe trenat nga Sanya, i njohur si “Hawaii i Kinës”, një ditë pasi u konfirmuan 263 raste pozitive.

Udhëtarët tani duhet të paraqesin pesë teste negative PCR gjatë shtatë ditëve përpara se të lejohen të largohen.

Kina është e vetmja ekonomi e madhe që ende ndjek një politikë “zero Covid”.

Kufizimet në Sanya, një qytet në ishullin jugor Hainan dhe një destinacion popullor vijnë gjatë sezonit turistik.

Shërbimet thelbësore si supermarketet dhe farmacitë mbeten të hapura, por vendet e argëtimit janë mbyllur që nga java e kaluar, raporton agjencia e lajmeve AFP.

Autoritetet kanë thënë se do t’u kërkojnë hoteleve të ofrojnë një zbritje prej 50 për qind derisa të hiqen kufizimet.

Sanya nuk është i vetmi qytet që ka hyrë në bllokim muajt e fundit. Rreth një milion njerëz në një periferi të Wuhan, qyteti në Kinën qendrore ku u regjistrua për herë të parë Covid-19, u përballën me masa të reja muajin e kaluar pasi u konfirmuan katër raste asimptomatike.