Instituti Kombëtar i Shëndetësisë Publike i Kosovës (IKSHPK). FOTO: Ministria e Shëndetësisë
Regjistrimi i rasteve me fruth në Kosovë - IKSHPK u bën thirrje prindërve që t'i vaksinojnë fëmijët
Instituti Kombëtar i Shëndetësisë Publike (IKSHPK) u ka bërë thirrje prindërve që të vaksinojnë fëmijët me vaksinën kundër fruthit, shytave dhe rubellës (vaksina MMR).
Pas regjistrimit të disa rasteve sporadike me fruth në Kosovë, IKSHPK thotë se vaksina mbetet mënyra më e sigurt për parandalimin e këtyre sëmundjeve.
“Gjatë këtij viti (periudha janar-mars 2025) janë regjistruar disa raste sporadike me fruth në vendin tonë, ndërkohë që vaksina mbetet mënyra më e sigurt për parandalimin e rasteve të reja.” – thuhet në njoftimin e IKSHPK-së.
Vaksina MMR sipas kalendarit të vaksinimit jepet në dy doza: doza e parë kur fëmija është 12-15 muaj dhe doza e dytë në moshën 5-6 vjeçe.
IKSHPK ka njoftuar se fëmijët të cilët për arsye të ndryshme nuk kanë arritur që ta marrin vaksinën sipas kalendarit të rregullt, mund të vaksinohen në çdo kohë, duke qenë se ajo mund të jepet edhe pas moshës 6 vjeçe, por me rëndësi të merren të dy dozat e vaksinës.
“Për shkak të rasteve të fundit të fruthit në vend dhe në shtetet fqinje është thelbësore që çdo fëmijë të jetë i vaksinuar, për të parandaluar shpërthime të mundshme dhe për të siguruar shëndetin e tyre e të fëmijëve të tjerë.” – thekson IKSHPK.
Ky institucion ka bërë të ditur se fëmijët mund të vaksinohen në QMF-në më të afërt të tyre.
Fruthi është sëmundje virale shumë ngjitëse dhe e rëndë, që shkaktohet nga një virus i familjes Paramyxoviridae. Përhapet kryesisht përmes ajrit e spërklave dhe përmes kontaktit të drejtpërdrejtë. Virusi infekton traktin respirator dhe pastaj përhapet në organizëm.
Shenja e parë e fruthit zakonisht është temperatura e lartë trupore, që zakonisht fillon rreth 10 deri më 12 ditë pas ekspozimit ndaj virusit dhe zgjat nga 4 deri në 7 ditë. Shenja të tjera të sëmundjes janë rrjedhje nga hunda, kolla, sytë e skuqur e të përlotur dhe pika të vogla e të bardha në mukozën që e mbështjell zgavrën e gojës. Pas disa ditësh paraqiten puçrrat, kryesisht në fytyrë dhe në pjesën e qafës.
