Numrimi i votave - Foto: Denis Sllovinja/KALLXO.com
Prokuroria nis hetimet në lidhje me procesin e votimit me postë
Prokuroria Themelore në Prishtinë ka nisur hetimet lidhur me procesin e votimit me postë për Zgjedhjet parlamentare të mbajtura më 09.02.2025.
“Prokuroria Themelore në Prishtinë e ka autorizuar Policinë e Kosovës në grumbullimin dhe verifikimin e informacioneve. Mirëpo, në këtë fazë të procedurës nuk mund të jepen detaje më të hollësishme, sepse mund të cenohet procesi hetimor.” – tha për KALLXO.com, Kaltrina Shala, zëdhënëse në Prokurorinë Themelore të Prishtinës.
Paneli Zgjedhor për Ankesa dhe Parashtresa (PZAP) e kishte hedhur si të pabazuar Ankesën e Lëvizjes Vetëvendosje kundër rezultatit përfundimtar të Zgjedhjeve, me të cilën kishte kërkuar anulimin e rezultatit të votave me postë për Lidhjen Demokratike të Kosovës dhe kandidatëve të saj, saktësisht anulimin e 18,933 votave.
Kërkesë e LVV-së ishte që të përsëritet votimi me postë, e po ashtu PZAP-së i ishte kërkuar që të largonte nga lista disa kandidatë të LDK-së për Deputet; krejt kjo me pretendimin për “manipulim votash”.
LVV ka pretenduar se manipulimi me vota ka filluar që nga regjistrimi i votuesve.
PZAP e ka gjetur këtë Ankesë si të pabazuar, për shkak se sipas tyre LVV nuk ka ofruar prova bindëse për kërkesën për anulimin e rezultatit të LDK-së.
Prokuroria, më 20.03.2025, ka konfirmuar për KALLXO.com se ka autorizuar Policinë që të grumbullojë informacione edhe në lidhje me shpërndarjen e disa videove nëpër rrjetet sociale nga kandidatët e LDK-së për Deputet, me pretendimin se LVV ka manipuluar me vota.
“Lidhur me pyetjet të cilat i keni parashtruar, Prokuroria Themelore në Prishtinë ju njofton se u ka lëshuar autorizim organeve të Policisë për mbledhjen dhe grumbullimin e të gjitha informacioneve në lidhje me ngjarjen aktuale.” – thuhej në përgjigjen e Prokurorisë.
Komisioni Qendror i Zgjedhjeve (KQZ), më 15.05.2025, ka shpallur rezultatet përfundimtare të Zgjedhjeve parlamentare që janë mbajtur më 09.02.2025.
Sipas këtyre rezultateve, Lëvizja Vetëvendosje ka dalë e para me 396,787 vota apo 42.30%, PDK është renditur e dyta me 196,474 apo 20.95%, LDK e treta me 171,357 apo 18.27%, AAK-Nisma me 66,256 vota apo 7.06%.
Sipas numrit të ulëseve që kanë siguruar në Kuvendin e Kosovës, partitë janë renditur kështu: LVV me 48 deputetë, PDK me 24 deputetë, LDK me 20 deputetë, Lista Serbe me 9 deputetë, AAK-Nisma me 8 deputetë etj.
