Policia jep detaje rreth aksionit kundër falsifikimit të diplomave
Policia e Kosovës përmes një komunikate për media ka sqaruar aksionin e djeshëm që është bërë në Prizren për falsifikim të diplomave shkollore.
Sipas policisë në këtë aksion janë arrestuar pesë persona, të cilët me vendim të prokurorit kompetent janë dërguar në mbajtje për 48 orë.
“Policia e Kosovës me njësitë kompetente për hetimin e krimit ekonomik dhe korrupsionit, pas hetimeve disa mujore dje me datën 09.10.2019, në lokacione të ndryshme në rajonin e Prizrenit dhe Prishtinës, ka arrestuar pesë (5) persona të dyshuar për veprën penale “falsifikim i dokumenteve”. Pesë (5) personat e dyshuar tani më të arrestuar, duke vepruar në grup në një periudhë kohore, me veprimtari ilegale të shtrirë në disa komuna dhe rajone të ndryshme të Republikës së Kosovës në këmbim të pagesave në tarifa të ndryshme, kanë siguruar dokumente zyrtare të falsifikuara–diploma të aftësimit profesional, diploma të shkollimit të mesëm e të tjera, për persona të ndryshëm”, thuhet në komunikatë.
Tutje Policia ka thënë se për arrestimin e të dyshuarve janë bërë hetime me muaj dhe se në mesin e të arrestuarëve janë 4 burra dhe një grua.
“Pas disa muajve të zhvillimit të hetimeve profesionale dhe aplikimit të masave të përcaktuara sipas kodit të procedurës penale të RKS-së (KPPRKS-së), nga sektori rajonal i hetimeve në Prizren në bashkëpunim me Prokurorinë e Shtetit dhe Drejtorinë për Mbështetje të Hetimeve nga DPP në Prishtine, dje me datën 09.10.2019, në flagrancë janë arrestuar pesë (5) persona të dyshuar (4 meshkuj/shqiptarë/kosovarë dhe një femër sh/kosovare) duke shitur diploma të shkollës së mesme”, thuhet tutje.
Policia poashtu kanë treguar edhe se çfarë kanë gjetur në bastisje.
“Si vazhdimësi e operacionit gjatë bastisjeve të realizuara në rajonin e Prizrenit dhe Prishtinës janë sekuestruar në cilësi të provave materiale: para, telefona mobilë, kopje të diplomave të profileve të ndryshme, vula, formularë të ndryshëm, forma bllanko të diplomave e të tjera”, thuhet në komunikatën e policisë.
Sipas policisë, plani operativ është realizuar në bashkëpunim dhe bashkërendim të plotë nga Sektori Rajonal i Hetimeve, Drejtoria Rajonale në Prizren, prokurori i Prokurorisë Themelore-Prizren. Njësia për Reagim të Shpejtë në Prizren dhe Drejtoria për Mbështetje të Hetimeve në DPP Prishtinë.
“Policia inkurajon qytetarët që çdo informacion të rëndësishëm që mund të dërgojë në parandalimin dhe luftimin e këtyre dukurive negative, përfshirë informacionet tjera që ndërlidhen me krimin e organizuar dhe korrupsionin, të vazhdojnë të bashkëpunojnë me Policinë e Kosovës, në mënyrë që kryerësit këtyre veprave penale të dalin para organeve të drejtësisë”, përfundon komunikata.
KALLXO.com ka raportuar dje në lidhje me këtë aksion.
www.kallxo.com.
