Policia e Kosovës sekuestron 885 shishe birrë, dyshohet se u futën ilegalisht nga Serbia

Policia e Kosovës, saktësisht Njësia e Task Forcës, ka parandaluar sot tri raste të kontrabandës me mallra në hyrje të fshatit Pogragjë të Gjilanit.

Në të tri automjetet që sipas Policisë ishin me targa të Serbisë janë gjetur dhe sekuestruar 885 shishe me birrë, pa dokumentacion përcjellës.

Ato dyshohet se janë futur përmes rrugëve ilegale nga Serbia, duke iu shmangur kontrollit doganor.

Në rastin e parë, Policia ka sekuestruar 287 copë shishe gjysmëlitërshe në një automjet të tipit “Passat”.

Në rastin e dytë janë sekuestruar 297 shishe në automjetin e tipit “Audi”, ndërsa në rastin e fundit 300 shishe birrë në automjet të markës “Mercedes”.

Tre të dyshuarit që kanë drejtuar automjetet janë S.B., M.S. dhe S.D.

“Lidhur me rastet është njoftuar prokurorja kujdestare, e cila ka urdhëruar inicimin e rasteve, të cilat do të vazhdojnë në procedurë të rregullt” – njofton Policia.

Malli i sekuestruar së bashku me automjetet i janë dorëzuar Doganës së Kosovës.