Policia e Kosovës, kamera Foto: KALLXO.com
Policia e Kosovës në trafik me kamera të vendosura në trup - VIDEO
Policia e Kosovës në trafikun rrugor ka nisur përdorimin e kamerave që vendosen në trup.
KALLXO.com sjell pamjet e zyrtarëve policorë të Njësitit të Trafikut për Regjionin e Prishtinës, nga testimi i kamerave të trupit.
Këto pajisje i janë dhënë Policisë së Kosovës donacion nga Shtetet e Bashkuara të Amerikës.
Zyrtari policor i Njësitit të Trafikut, Ajet Ajeti, thotë se rëndësia e këtyre kamerave të trupit, është duke ndikuar në punën e zyrtarëve policorë dhe të vetë qytetarëve.
“Kamera shërben për siguri personale, mirëpo njëkohësisht edhe e rritë besueshmërinë tek qytetarët e vendit, po ashtu edhe e prezanton punën dhe argumentin e zyrtarit policor në terren”.
Këto kamera të vendosura në trupin e zyrtarit policor, duhet të aplikohen për tetë orë punë.
“Çdo zyrtar policor e ka barkodin e tij në lidhje me kamerën, çdo fillim të ndërrimit përmes barkodit e kyç pajisjen. Në fund të ndërrimit, kur përfundon ndërrimi, atëherë kur kthehemi në stacion, përmes barkodit edhe e shkyç”
Sipas Ajetit, puna me këto kamera është me siguri më të madhe duke shërbyer në vend të aksidentit të trafikut, në zbulimin dhe shqiptimin e kundërvajtjeve.
Siç tregon ai, kjo ka pasur ndikim pozitiv tek qytetarët prej tash e dy ditëve kur ka filluar puna dhe aplikimi i kamerave të trupit nga policia.
Faza testuese e përdorimit të kamerave të trupit ka filluar më 7 korrik.