Në 24 vjetorin e bombardimeve, Osmani nderon të rënët që shërbyen në NATO e KFOR

Presidentja e Kosovës Vjosa Osmani, në 24 vjetorin e fillimit të bombardimeve të NATO-s, ka bërë homazhe në nderim të burrave dhe grave që kanë shërbyer në partneritet më NATO -n dhe KFOR-in.

Osmani ka përkujtuar sakrificën e tyre.

Bashkë me presidenten e vendit, të pranishëm kanë qenë edhe Ambasadori i Britanisë së Madhe në Kosovë, Nicholas Abbott dhe ambasadori i Shteteve të Bashkuara Jeffrey Hovenier.

24 vjet më parë, më 24 mars 1999, aeroplanët e NATO-s lëshuan bombat e para kundër pozicioneve strategjike të ushtrisë së Jugosllavisë.

Urdhrin për fillimin e fushatës bombarduese e kishte dhënë Presidenti i Shteteve të Bashkuara të Amerikës, Bill Clinton.

Sulmet ajrore kundër forcave serbe e malazeze vazhduan deri më 9 qershor, kur u arrit Marrëveshja e Kumanovës.

Në përkujtim të kësaj ngjarje, sot në Kosovë do të organizohen disa aktivitete.

Në Gllogjan të Deçanit do të shënohet manifestimi qendror në shënim të 25-vjetorit të Epopesë së Dukagjinit dhe 24-vjetorit të ndërhyrjes së NATO-s.

Në Gllogjan për homazhe dhe vizitë te familja Haradinaj do të shkojë edhe kryeministri Kurti me kabinetin e tij.