Ndalohet për 48 orë një burrë në Gjilan, dyshohet se përfitoi kundërligjshëm 50,000 euro nga një tjetër

Prokuroria Themelore në Gjilan ka njoftuar se ka ndaluar të pandehurin D.S., për shkak të dyshimit se ka kryer veprën penale “detyrimi”.

Sipas njoftimit të Prokurorisë dyshohet se D.S., nga data 29.05.2024 deri në momentin e arrestimit të tij, përmes kanosjes serioze, me qëllim të përfitimit të kundërligjshëm pasuror ka detyruar të dëmtuarin F.S., që t’i jepte shuma të ndryshme të parave.

“Ku bazuar në provat e siguruara gjatë hetimit dyshohet se ka përfituar rreth 50,000 euro nga i dëmtuari. Me Vendim të Prokurorit i pandehuri D.S. gjendet nën masën e ndalimit 48-orësh dhe brenda afatit ligjor ndaj tij do të ushtrohet kërkesa për caktimin e masës së paraburgimit.” – njofton Prokuroria, më 27.03.2025.

Në anën tjetër, në Raportin e Policisë së Kosovës u njoftua se për periudhën e njëjtë në Gjilan një burrë dyshohet se duke e kanosur e kishte detyruar një grua t’i japë shuma të ndryshme parash.