![Presidentja e Kosoves, Vjosa Osmani](https://kallxo.com/wp-content/uploads/2024/04/Vjosa-Osmani-4-720x480.jpg)
Presidentja e Kosoves, Vjosa Osmani Foto: Denis Sllovinja /KALLXO.com
Miratimi i rezolutës për gjenocidin në Srebrenicë, reagon presidentja Osmani
Asambleja e Përgjithshme e Kombeve të Bashkuara ka votuar sot, më 23.05.2024, me 84 vota për propozim-rezolutën për gjenocidin në Srebrenicë.
19 vota ishin kundër e 68 të tjera abstenime.
Rezoluta, e cila propozon që 11 korriku të shpallet Ditë Ndërkombëtare e Përkujtimit të Viktimave të Gjenocidit të Srebrenicës, si dhe dënon mohimin e gjenocidit dhe madhërimin e kriminelëve të luftës, u sponsorizua nga tridhjetë vende.
E për këtë ka reaguar edhe presidentja e Kosovës, Vjosa Osmani, e cila ka thënë se Srebrenica do të kujtohet më 11 korrik dhe çdo ditë tjetër.
Ajo tha se me caktimin e sotëm nga AP e OKB-së të Ditës Ndërkombëtare të Reflektimit dhe Përkujtimit të Gjenocidit të Srebrenicës, bota po u jep brezave të ardhshëm një shans për të mësuar nga mësimet e nxjerra nga Srebrenica.
“Njohja është një hap kyç drejt pajtimit dhe luftimit të mohimit të gjenocidit. Është thelbësore për shërimin dhe për paqen e qëndrueshme, duke u ofruar ngushëllim nënave të Srebrenicës dhe të gjithë anëtarëve të familjeve të mbijetuara, duke siguruar që të dashurit e tyre nuk do të harrohen kurrë” – tha Osmani.
We will remember! On July 11th and every day!
With today’s establishment by UNGA of the Intl’ Day of Reflection and Commemoration of the Srebrenica Genocide, the world is giving future generations a chance to learn from the lessons drawn from Srebrenica.
Recognition is a key… pic.twitter.com/KtsvgfqmKs
— Vjosa Osmani (@VjosaOsmaniPRKS) May 23, 2024
Propozueset zyrtare të kësaj rezolute ishin Gjermania dhe Ruanda.
Mbështetje për të, deri më tash, shprehën të gjitha vendet e Ballkanit Perëndimor, përveç Serbisë dhe entitetit serb të Bosnje e Hercegovinës, Republika Sërpska.
Zyrtarët e tyre, pavarësisht vendimeve të gjykatave ndërkombëtare, mohojnë se në Srebrenicë është kryer gjenocid kundër boshnjakëve dhe thonë se atje ka ndodhur një “krim i tmerrshëm”.
Në korrik të vitit 1995, forcat serbe të Bosnjës vranë mbi 8.000 burra dhe djem myslimanë në Srebrenicë.
Për gjenocidin e kryer u dënuan më shumë se 50 persona me rreth 700 vjet burg.
Në Asamblenë e Përgjithshme të OKB-së miratohet rezoluta për gjenocidin në Srebrenicë