Kurti takohet me Veton Berishën e PLE-së, flasin për formimin e institucioneve
Kryeministri në detyrë i Kosovës, Albin Kurti është takuar me kryetarin e Partisë Liberale Egjiptiane, Veton Berisha.
Me Berishën Kurti u takua në kuadër të konsultimeve për formimin e Qeverisë së re.
“Kryeministri Kurti e uroi z. Berisha për mandatin e Deputetit dhe rikthimin e tij në Kuvendin e Republikës. Diskutuan për procesin e konstituimit të Kuvendit dhe formimit të Qeverisë së re pas certifikimit të rezultateve nga Zgjedhjet e 9 shkurtit. U theksua rëndësia e formimit të institucioneve brenda afateve ligjore dhe kushtetuese.” – thuhet në komunikatën e Zyrës së Kryeministrit.
Kurti takimet i ka filluar me ministrin për Komunitete dhe Kthim, njëherësh kryetarin e Partisë për Liri, Drejtësi dhe Mbijetesë, Nenad Rashiq dhe me kryetaren e Partisë së Re Demokratike (NDS) Emilija Rexhepi, e cila është Zëvendëskryeministre e Tretë për Çështje të Pakicave dhe Të Drejtat e Njeriut. Pas tyre është takuar edhe me kryetaren e Unionit Socialdemokrat (SDU) Duda Balje dhe me ministrin e Zhvillimit Rajonal i cili është edhe kryetar i Partisë Demokratike Turke të Kosovës, Fikrim Damka.
Kurti është shprehur vazhdimisht që Qeverinë do ta formojë me partitë e komuniteteve joshumicë.
Kreu i LVV-së Albin Kurti po synon që Qeverinë ta formojë pa bashkëpunuar me partitë opozitare. Mirëpo edhe pse janë certifikuar Zgjedhjet, Kurti nuk ka pranuar të japë përgjigje se si do të arrijë t’i bëjë 61 deputetë për ta formuar Qeverinë.
Në bazë të rezultateve të Zgjedhjeve të 9 shkurtit 2025, propozimi i emrit të Kryetarit të Kuvendit i takon LVV-së.
Sipas këtij rezultati Lëvizja Vetëvendosje ka marrë 42.30% të votave – duke i siguruar 48 deputetët në Kuvend, Partia Demokratike e Kosovës ka marrë 20.95% të votave apo 24 deputetë, Lidhja Demokratike e Kosovës me 18.27% apo 20 deputetë dhe koalicioni AAK-NISMA 7.06% apo 8 deputetë.
Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.
10 deputetët e tjerë do të jenë nga komunitetet e tjera joshumicë.
Dy deputetë i ka Kosova Demokratik Turk Partisi dhe me nga një deputet janë partitë: Iniciativa e Re Demokratike e Kosovës, Nova Demokratska Stranka, Socijaldemokratska Unija, Partia Liberale Egjiptiane, Koalicija Vakat, Partia e Ashkalinjve për Integrim, Jedinstvena Goranska Partija dhe Partia Rome e Bashkuar e Kosovës.
