KQZ: Javën e ardhshme fillon numërimi i votave nga dispora, me kusht dhe votave të personave me nevoja të veçanta

Komisioni Qendror i Zgjedhjeve (KQZ) është duke bërë vlerësimin e pakove me fletëvotime nga votimi jashtë vendit, përkatësisht nga votimi përmes postës. 

Kështu bën të ditur zëdhënësi i KQZ-së, Valmir Elezi, i cili thotë se që nga data e mbajtjes së zgjedhjeve (09.02.2025), këtij procesi i janë nënshtruar mbi 54 mijë pako, prej të cilave thotë se janë aprovuar 51 mijë e 140, ndërkaq janë refuzuar 3 mijë e 269 sosh. 

 “Arsyeja se përse janë refuzuar këto dërgesa, është se ato janë janë dërguar nga persona që janë anuluar gjatë regjistrimit si votues jashtë Kosovës; u mungon dëftesa e regjistrimit; janë dërguar më shumë se një herë; kanë dërguar më shumë se një fletëvotim”- ka thënë Elezi për KALLXO.com. 

Ai ka shtuar se procesit të vlerësimit do t’i nënshtrohen edhe 14 mijë e 306 pako me fletëvotime.

Elezi shton se gjatë periudhës së regjistrimit, nga 104,924 shtetas të regjistruar për votim jashtë Kosovës, 84,600 ishin regjistruar për të votuar përmes postës dhe 20,324 të tjerë ishin regjistruar për votimin fizik në përfaqësitë diplomatike. 

“Nga 20,324 në përfaqësi diplomatike kanë votuar 15,352 votues, ndërkaq në votimin përmes postës KQZ ka pranuar rreth 69 mijë pako me fletëvotime”- deklaron Elezi nga KQZ. 

E gjatë javës së ardhshme, Elezi bën të ditur se do të fillojë edhe numërimi i votave me kusht, votave të personave me nevoja të veçanta dhe votave nga votimi jashtë Kosovës.

Mbrëmjen e 21.02.2025, është përmbyllur procesi i numërimit të votave të kandidatëve për deputetë dhe verifikimit të votave të subjekteve politike nga formularët e plotësuar në vendvotime më 09.02.2025

Kështu bëri të ditur KQZ përmes një njoftimi, përmes të cilit tha se në 38 Qendrat Komunale të Numërimit KQZ-ja ka ofruar transparencë të plotë të procesit të numërimit duke prezantuar në ekrane punën e çdo ekipi të numërimit, përfshirë pamjen e fletëvotimeve të plotësuara në vendvotime nga votuesit dhe krijimin e formularëve digjital.

Në bazë të rezultateve të fundit preliminare të përditësuara në orën 10:27, më 20.02.2025, në uebfaqen e KQZ-së, Lëvizja Vetëvendosje (LVV) është e para me 40.80%, apo 342,254 vota.

Partia e dytë me më së shumti vota është Partia Demokratike e Kosovës (PDK) me 22.05% e votave, apo 184,936 vota.

E treta është renditur Lidhja Demokratike e Kosovës (LDK) me 17.64%, apo 147,928 vota.

Në këto rezultate nuk përfshihen rezultatet e votave me kusht, votave të personave me nevoja të veçanta dhe votave nga votimi jashtë Kosovës.

KQZ-ja ka njoftuar se pas numërimit të votave të kandidatëve për deputetë dhe verifikimit të rezultateve të subjekteve politike nga Formularët e rezultateve të plotësuar në vendvotime – proces i cili është zhvilluar dhe po vazhdon në Qendrat Komunale të Numërimit – në platformën elektronike https://rezultatet2025.net janë publikuar rezultatet për subjektet politike dhe kandidatët për deputetë.

Zgjedhjet parlamentare janë mbajtur më 09.02.2025. Këto janë zgjedhjet e para të rregullta që Kosova i ka mbajtur që nga shpallja e pavarësisë në vitin 2008.