Interpelancat për Avdullah Hotin, Isa Mustafa i quan mësymje
Kryetari i Lidhjes Demokratike të Kosovës, Isa Mustafa, ka kritikuar thirrjen në tri interpelanca të kryeministrit Avdullah Hoti, nga ana e Kuvendit të Kosovës.
Mustafa në Facebook ka shkruar se tri interpelancat janë mësymje kundër kryeministrit Hoti.
Sipas Mustafës, dy prej interpelancave janë kundër marrëveshjes dhe bashkëpunimit me SHBA-të.
“Sot, tri interpelanca njëpasnjë në Kuvendin e Kosovës. Tri mësymje kundër Kryeministrit Hoti. Dy, kundër marrëveshjes dhe bashkëpunimit me SHBA-të dhe një, pse është shprehur se duhet të zbatohet Aktgjykimi i Gjykatës Kushtetuese për respektimin e Ligjit të miratuar me 2/3 e deputetëve, i cili ka krijuar detyrime ndërkombëtare të Kosovës”, ka shkruar kreu i LDK-së.
Mustafa ka shtuar se ata që e vlerësojnë miqësinë dhe partneritetin me SHBA-të, sot janë me kryeministrin.
“Ata që ndajnë bindjen se Kosova duhet tu përmbahet marrëveshjeve ndërkombëtare dhe Ligjit, si dhe partneritetit me BE-në, sot mbështesin sjelljen parimore dhe të përgjegjshme të Kryeministrit dhe Qeverisë Hoti!”, thuhet në publikimin e tij.
Kuvendi i Kosovës sot do të mblidhet për mbajtjen e dy seancave.
Në të parën do të shqyrtohen disa marrëveshje ndërkombëtare, kurse në seancën e dytë të thirrur për në orën 10:00, në rend të ditës janë tri interpelanca të kryeministrit të Kosovës, Avdullah Hoti.
Interpelanca e parë është thirrur në lidhje me pezullimin njëvjeçar të aplikimit të Republikës së Kosovës për anëtarësim në organizata ndërkombëtare, e dyta ka të bëjë me përfshirjen e Republikës së Kosovës në “Zonën e mini-Shengenit ballkanik” dhe e treta është në lidhje me deklarimin dhe qëndrimin e kryeministrit për zbatimin e Marrëveshjes për themelimin e Asociacionit të Komunave me shumicë serbe.
Kuvendi nesër mban dy seanca, Hoti i thirrur në tri interpelanca
