Hungaria nëpër tym e miraton ligjin që e ndalon Paradën e Krenarisë

Parlamenti i Hungarisë e ka aprovuar të martën ligjin që ndalon Paradën e Krenarisë të komuniteteve LGBTQ+ dhe ka mbështetur një rezolutë që kundërshton huamarrjen e përbashkët të BE-së për shpenzime të mbrojtjes, derisa kryeministri Viktor Orban po përçon sinjale para samitit të Brukselit më vonë gjatë javës, ka raportuar agjencia e lajmeve, Reuters.

Partia Fidesz e Orbanit, e cila ka shumicën parlamentare në parlament, dorëzoi draftin të hënën me të cilin ndalohet marshi i Krenarisë me pretendimin se parada do të dëmtonte fëmijët, dhe e ka aprovuar të martën në një proces të pashembullt.

Orban, i cili përballet me një sfidë të paprecedentë nga një parti e re opozitare në rritje përpara zgjedhjeve të vitit 2026, ka kritikuar komunitetin LGBTQ+ dhe është zotuar të godasë fondet e huaja të mediave të pavarura dhe OJQ-ve në Hungari në javët e fundit.

Legjislacioni u kritikua nga kryetari liberal i Budapestit, ndërsa ligjvënësit nga partia e vogël opozitare Momentum ndezën pishtar tymi dhe shpërndanë në sallë foto të manipuluara që përshkruanin Orban dhe presidentin rus Vladimir Putin duke u puthur në sallën e votimit.

Organizatorët kanë theksuar se planifikojnë të mbajnë marshimin e Krenarisë këtë vit pavarësisht ndalimit.

Ligji e kategorizon si shkelje mbajtjen ose pjesëmarrjen në ngjarje që shkelin legjislacionin hungarez të “mbrojtjes së fëmijëve”, që ndalon “përshkrimin ose promovimin” e homoseksualitetit para fëmijëve nën 18 vjeç.

Pjesëmarrja në një ngjarje të ndaluar do të gjobitej me një gjobë prej 546 dollarësh amerikan, vlerë që shteti pastaj do ta alokonte për “mbrojtje të fëmijëve”.

Aprovimi është hapi i fundit kundër komunitetit LGBTQ+ i ndërmarrë prej kryeministrit Viktor Orban, qeveria e të cilit ka aprovuar legjislacion që grupet e të drejtave të njeriut dhe politikanët e tjerë europianë e kanë denoncuar si represiv kundër pakicave seksuale.

Qeveria e portretizon veten si kampione të vlerave tradicionale të familjes dhe mbrojtëse të qytetërimit të krishterë nga ajo që e quan “çmenduri gjinore” dhe argumenton se politikat e saj janë të dizajnuara për mbrojtjen e fëmijëve nga “propaganda seksuale”.

Ligji për “mbrojtjen e fëmijëve” i Hungarisë u miratua në vitin 2021. Përveç ndalimit të “përshkrimit ose promovimit” të homoseksualitetit në përmbajtjen e disponueshme për të miturit – duke përfshirë në televizion, filma, reklama dhe literaturë –gjithashtu ndalon përmendjen e çështjeve LGBTQ+ në programet e edukimit shkollor dhe ndalon përshkrimin publik të “gjinisë në lindje”.

Parlamenti hungarez miratoi gjithashtu një rezolutë që kundërshton huamarrjen e përbashkët evropiane për mbrojtjen, pasi Orban ka deklaruar javën e kaluar se Hungaria duhet të marrë pjesë në politikën e përbashkët europiane të mbrojtjes dhe të kontribuojë me fonde për të, por nuk duhet të pajtohet me huamarrjen e përbashkët.

Komisioni Europian propozoi në fillim të këtij muaji për të marrë hua deri në 150 miliardë euro për t’u dhënë hua qeverive të BE-së sipas një plani riarmatimi. Për miratim, propozimi kërkon një shumicë të cilësuar ose mbështetjen e të paktën 15 nga 27 vendet e BE-së, që përfaqësojnë të paktën 65 për qind të popullsisë së bllokut. Vetëm Hungaria nuk mund ta bllokojë planin.

Përgatiti: Rexhep Maloku – Kallxo.com