‘Ec me këpucët e mia', thirrje për gjithëpërfshirje dhe përkrahje për personat me sindromën Down

Mesdita e sotme mblodhi para Kuvendit të Kosovës në Prishtinë dhjetëra qytetarë, të cilët kanë dalë për të përkrahur personat me sindromën Down.

Këta të fundit të shoqëruar nga familjarë dhe aktivistë mbanin në duar pankarta me thirrje për ndalim të paragjykimit e diskriminimit dhe për trajtim të barabartë në shoqëri.

Këtë vit rol të veçantë kishin edhe këpucët të cilat përçonin mesazhin se sfidat e këtij komuniteti, mund të kuptohen duke e vënë veten në pozitën e këtyre të fundit.

Me moton “Ec me këpucët e mia” u mbajt marshi në kryeqytet, në kuadër të Ditës Botërore të sindromës Down, e cila shënohet çdo 21 mars.

Nisja e këtij organizimi u bë nga Kuvendi i Kosovës ku pjesë e marshit u bë edhe Presidentja e Kosovës, Vjosa Osmani, për të vazhduar më pas deri tek sheshi “Zahir Pajaziti” ku ecja u përmbyll me mesazhin “Të ecim të gjithë së bashku”.

Drejtoresha e Shoqatës “Down Syndrome Kosova”, Sebahate Hajdini-Beqiri, theksoi para mediave nevojën e personave me sindromën Down për mbështjetje institucionale dhe për realizimin e të drejtave të tyre.

“Personat me sindromën Down dhe familjarët e tyre çdo ditë ballafaqohen me sfida të ndryshme, mirëpo mbështjetja e presidentes në fushatën tonë dhe gjithë përfaqësuesve na motivojnë dhe na japin shpresa që të drejtat e personave me sindromën Down do të jenë prioritet i institucioneve tona të vendit”, tha Hajdini-Beqiri.

Në anën tjetër, teksa e para e shtetit premtoi se nga ana institucionale do të bëhet gjithçka që është në kompetencat e tyre që personat me sindromën Down të jenë të gjithpërfshirë dhe të barabartë në shoqëri, ajo po ashtu pati edhe një thirrje ndaj secilit individ që ta vërë veten në këpucët e këtyre personave për ta kuptuar se si ndihen ata shpesh. Një gjë të tillë ajo e cilësoi si obligim moral njerëzor.

“Gjithsecili prej nesh ua kemi borxh që të punojmë bashkërisht dhe përveç gjithëpërfshrjes dhe bashkëpunimit, ta kuptojmë si është edhe të ecim në këpucët e tyre në një shoqëri që fatkeqësisht deri tani nuk ka ofruar trajtim të barabartë” u shpreh Osmani.

Ndër të tjera ajo përmendi edhe fushat kryesore ndaj këtij komuniteti në të cilat nevojitet investimi i shtetit.

“Disa prej kërkesave themelore kanë të bëjnë me terapitë fizike, me terapi psikologjike, me llogopedi, janë fusha të cilat jo domosdoshmërisht…janë të zhvilluara në shtetin tonë, prandaj në radhë të parë ne duhet të investojmë në kuadro të mirëfillta të cilat pastaj mund të ndihmojnë fëmijët me sindromën Down qysh nga ditët e para sepse është shumë me rëndësi që të investohet në të përkrahen ata që nga ditët e para pas lindjes në mënyrë që pastaj edhe ata të bëhen anëtarë me potencial të plotë në shoqërinë tonë….”, shtoi ajo.

Pjesëmarrëse në këtë ngjarje ishte edhe kryetarja e Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, Duda Balje, e cila për KALLXO.com theksoi se mbështetja e këtij komisioni ndaj personave me sindromën Down do të jetë prezente gjatë tërë kohës.

“Ata kanë përkrahje nga ana ime non-stop, unë nuk jam veç sot këtu, domethënë, ne gjatë vitit jemi bashkë edhe unë do të ndihmoj sa mundem…. Tash është koha mos me fol shumë, veç me konkretizu punën të cilën ne kemi për punësim edhe për financim, për nevojat të cilat ata i kanë gjatë vitit e jo veç në një ditë”, theksoi Balje.

Drejtoresha Beqiri prezantoi para presidentes Osmani dhe deputetes Balje edhe punimet e krijuara nga anëtarët e Shoqatës Down Syndrome Kosova, ku paratë e fituara nga shitja e këtyre produkteve do të shkojnë për këtë shoqatë.

Më 3 dhjetor të vitit të kaluar, për nder të Ditës Ndërkombëtare të Personave me Aftësi të Kufizuara, Zyra për Qeverisje të Mirë në kuadër të Zyrës se Kryeministrit, përmes një konferencë shpalli 2022-ën vit të personave me nevoja të veçanta në Republikën e Kosovës.

Më poshtë gjeni fotogalerinë nga marshi i sotëm në Prishtinë: