Del para Gjykatës së Apelit kosovari i akuzuar se veshi fëmijën me eksploziv në Siri
Dënimi prej 5 vite e 6 muaj burg po i duket i ulët Prokurorisë për Visar Qukovcin, që u dënua nga Gjykata Themelore për terrorizëm dhe keqtrajtim të fëmijës. Ndërsa avokati i të akuzuarit po e quan dënimin shumë të lartë.
Qukovci po akuzohet se shkoi në Siri për t’iu bashkuar ISIS-it ku më pas kishte punuar si infermier. Sipas prokurorisë, në shtëpinë që ia kishin dhënë anëtarët e ISIS-it, i akuzuari e kishte veshur me jelek me eksplozi (hizam) djalin tre vjeçar duke i dhënë edhe automatikun i kishte thënë “merre kallashin gjuaj bam-bam”.
Sipas prokurorisë të gjitha këto veprime i ka inçizuar në video- kamerë, ndërsa Qukovci e kishte pranuar fajësinë për terrorizëm.
Sot është mbajtur seanca në Gjykatën e Apelit lidhur me këtë rast, në mungesë të përfaqësuesit të Prokurorisë së Apelit.
Megjithatë, mbrojtja e të akuzuarit pati disa pika që ia prezantoi gjykatës lidhur me rrethanat lehëtësuese që sipas tyre është dashur të merren parasysh nga gjykata që e dënoi Qukovcin..
Mbrojtësi i të akuzuarit Argjent Tigani në fjalën e tij deklaroi se kanë hasur në disa shkelje.
”Pas parashtrimit të ankesës lidhur me sanksionin penal kemi hasur në disa shkelje. Gjykata Themelore nuk ka bërë llogaritjen e kohës sa ka qëndruar i mbrojturi im në paraburgim, në vendin prej të cilit është riatdhesuar në Kosovë.” , tha avokati, i cili propozoi të të llogaritet edhe kjo kohë.
Avokati gjithashtu argumentoi se gjykata vendore nuk ka juridikson lidhur me veprën e keqtrajtimit të fëmijës që ka ndodhur në një shtet tjetër, përkatësisht në Siri. Ai kërkoi që gjykata ta lirojë të akuzuarin nga kjo pikë e aktakuzës.
“Ndërkaq sa i perket vepres penale keqtrajtimi apo braktisja e fëmijëve nuk bie nën juridiksionin e Kosovës ta gjykojë këtë rast, për shkak se kjo do të duhej të gjykohet në vendin ku është kryer vepra penale e pretenduar. Sa i përket kësaj vepre penale, Gjykata Themelore nuk ka vleresuar sipas detyrës zyrtare se a ka kompetencë për gjykim”, tha ndër të tjera Tigani.
Ai gjithashtu propozoi që dënimi të zbutet pasi i akuzuari ka qenë infermier, dhe “pozicioni i tij në luftë ka dallim nga pjesëtarët e tjere të organizatë”.
Tutje,i akuzuari Visar Qukovci kundërshtoi pretendimet e prokurorisë lidhur me faktin se ka bërë propagandë, pasi sipas tij videon në fjalë e ka pasur në USB personale, mirëpo asnjeherë nuk e ka publikuar.
Veprimi i paprecedent i kosovarit si ish-pjesëtar i ISIS-it, e veshi djalin 3 vjeçar me eksploziv
