Arrestohet dhe suspendohet një polic i dyshuar për kanosje

Hetuesit e Inspektoratit Policor të Kosovës (IPK) kanë arrestuar dje më 31.08.2024 një zyrtar policor në Prizren me dyshimin se i njëjti ka kryer veprën penale  “kanosje”.

Sipas njoftimit të IPK-së, informacionet e para lidhur me këtë rast hetuesit e IPK-së i kishin pranuar dje pas orës 17:00 nga Policia e Kosovës në Prizren se një zyrtar policor  është i përfshirë si i dyshuar në një rast të kanosjes.

“Hetuesit e IPK-së kanë dalë në vendin e ngjarjes dhe në koordinim me Prokurorin  kanë ndërmarrë disa veprime hetimore. Pas këtyre veprimeve hetimore, zyrtarit policor me vendim të prokurorit i është caktuar masa e ndalimit për 48 orë me dyshimin se ka kryer veprën penale “kanosje” – thuhet në njoftimin e IPK-së.

Lidhur me rastin e njëjtë, IPK njoftoi se si pjesë e procedurave administrative dhe hetimore, zyrtari policor është suspenduar.

“Hetuesit e IPK-së pritet të ndërmarrin edhe veprime të tjera hetimore drejt ndriçimit të të gjitha rrethanave të këtij rasti”- përfundon komunikata.