Arifi: Rasti i Hasan Krasniqit është pasqyrë se çfarë situate kemi në shumicën e institucioneve

Avokati Qendrim Arifi ka thënë se rasti i kryeshefit të KRU Gjakovës, Hasan Krasniqit, që është duke u hetuar në lidhje me dy tenderë, sipas tij, është pasqyrë se në çfarë situate janë shumica e institucioneve.

Në emisionin “Kallxo Përnime” Arifi tha se procedurat e negociuara është mirë ekzistojnë në sistemin e prokurimit publik në Kosovë, por sipas tij, problemi krijohet kur këto procedura keqpërdoren.

“Unë vlerësoj që problemi krijohet në momentin kur këto procedura keqpërdoren, pra nuk zbatohen për ato se qysh e ka përcaktuar ligji. Qysh kemi ardhë në këtë pjesë unë mendoj që problemi më të madh ne e kemi me kontratat të hapura. Duke e parë se çfarë ndikimi ka Krasniqi brenda institucionit të vet, brenda KRU Gjakovës unë them haptas që kjo është pasqyrë se çfarë situate kemi në shumicën e institucioneve të tilla”– ka thënë Arifi.

“Dhe nuk është përjashtim. Ndërhyrja flagrante ose fuqia e kundërligjshme që ka ZKA-ja rrjedhimisht udhëheqësi i institucionit në zyrën e prokurimit është për të ardhë keq. Ky ndikim masnej, fillimisht, ia cakton kujna me ja dhënë kontratën duke ia përshtatur kriteret dhe ka ndikim direkt në nëpunësit”.

Hasan Krasniqi, kryeshef i KRU Gjakova është arrestuar me datë 18.03.2025 në Gjakovë me urdhër të Prokurorisë Speciale, në lidhje me tenderin për blerjen e një barke nga ana e KRU Gjakovës. Ai po dyshohet për keqpërdorim të detyrës zyrtare. Hetimi ndaj tij që rezultoi me arrestim, ka filluar pas publikimit të hulumtimit në KALLXO.com, në tetor të vitit 2024. Gjykata me 20.03.2025 i ka caktuar atij masën e paraburgimit prej 30 ditësh, pas kërkesës së Prokurorisë Speciale.

Hulumtimi tregonte se si Kompania Rajonale e Ujësjellësit “Gjakova” kishte blerë një barkë/anije të vogël në vlerë 24,500 euro por e njëjta nuk arriti të shfrytëzohej pasi që u sekuestrua nga ana e Doganës dhe Policisë së Kosovës. Kjo barkë u ble nga KRU “Gjakova” prej një kompanie e cila ishte regjistruar rreth një muaj para se ta fitonte tenderin.

Krasniqi është duke u hetuar nga Prokuroria Speciale edhe për një rast tjetër, për të cilin KALLXO.com ka publikuar një hulumtim.

Në hulumtimin e publikuar në Kallxo Përnime me 09.03.2025 në të cilin shfaqeshin disa audio-incizime në të cilat dëgjohet kryeshefi i KRU “Gjakova”, Hasan Krasniqi, teksa flet për negocim të një Kontrate dhe konfirmon përfshirjen e tij në kontaktimin e bizneseve që do të merreshin me servisimin e makinave të Ndërmarrjes, si dhe dëgjohet duke thënë se do të zgjedhë Kompaninë për të nënshkruar Kontratën, për një tender për servisimin e veturave.

Incizimet që janë publikuar në emisionin “KallxoPërnime” dëshmojnë se kryeshefi i KRU “Gjakova”, Hasan Krasniqi e ka pranuar para stafit të tij se i ka dhënë instruksione shoferit të tij, Valon Gunga, për të dalë dhe për të gjetur Kompani që servisojnë makina.

Ai dëgjohet po ashtu duke thënë se ka shkuar te dy Kompani për t’u kërkuar atyre që të ofrojnë vetëm dokumentacionin për nënshkrimin e Kontratës, ndërsa punët do t’i kryente dikush tjetër.

Gjithashtu, Krasniqi dëgjohet duke thënë para stafit të tij se “Unë do të zgjedh Kompaninë” – në lidhje me tenderin për servisimin e veturave të Kompanisë.