Albin Kurti emëron një zëvendësministre të Drejtësisë

Kryeministri i Kosovës, Albin Kurti, ka njoftuar se ka emëruar sot Nita Shalën, zëvendësministre në Ministrinë e Drejtësisë.

Kështu është bërë e ditur përmes një komunikate për media nga Zyra e Kryeministrit.

Sipas njoftimit, Shala është avokate me eksperiencë profesionale në institucione ndërkombëtare.

Ky është njoftimi i plotë i Zyrës së Kryeministrit në të cilën ka prezantuar biografinë e tashmë zëvendësministres së Drejtësisë, ministri kjo që udhëhiqet nga Albulena Haxhiu.

Nita Shala është Doktor Shkencash në Drejtësi nga Graduate Institute – Geneva. Ka shkëlqyer gjatë studimeve themelore në Fakultetin Juridik të Universitetit të Prishtinës; në studimet master për drejtësi penale në Universitetin e Oxfordit dhe në studime ekzekutive në Harvard, Shkolla për Qeverisje Kennedy.

Nita Shala është avokate me eksperiencë profesionale në institucione ndërkombëtare. Punoi edhe në zyrën e OKB-së në Gjenevë, për ta këshilluar ambasadën e Republikës së Shqipërisë në proceset e Këshillit për të Drejtat e Njeriut; në zyrën e Prokurorit në Tribunalin e Hagës, e angazhuar në Prokurori kundër Vojislav Sheshel dhe kundër Vlastimir Xhorxhevic, dhe mbështetje ndërkombëtare në EURALIUS dhe PAMECA V në Shqipëri si ekspert ligjor i procesit të implementimit të Reformës dhe themelimit të institucioneve të reja në drejtësi. Nga viti 2018, punon në Katedrën Penale në Fakultetin Juridik, Universiteti i Prishtinës, në lëndët e drejta penale dhe e drejta penale ndërkombëtare.

Është themeluese dhe drejtuese e komunitetit Global Shapers të Forumit Ekonomik Botëror në Tiranë dhe kryesuese e komunitetit të Global Dignity në Shqipëri dhe Kosovë.

Nita Shala ka eksperiencë profesionale dhe akademike në fushat e antikorrupsionit, reformës në drejtësi, dhe në të drejtat e njeriut. Nita si pjesë e Qeverisë, me njohuritë e saj teorike dhe praktike është shpresë për të shtyrë procesin e vetingut në gjyqësor dhe luftën kundër korrupsionit.