Postimi i rremë për deklarimet e ministrit Murati
Deklarata
Paraja e prish njeriun. Prandaj unë dua që populli të jetoj i varfër dhe pa PARA
Vlerësimi
Rrenë
Publikimi “Paraja e prish njeriun. Prandaj unë dua që populli të jetoj i varfër dhe pa PARA. Ministri i fukarallakut, e mallkoftë Zot” është i rremë. Krypometri ka konfirmuar me burime zyrtare se Hekuran Murati nuk e ka thënë një deklaratë të tillë.
Artikulli
Më 09 shtator 2023 grupi publik në Facebook, “Diaspora me PDK 👍” publikoi një fotografi ku shihet ministri i Financave, Punës dhe Transfereve, Hekuran Murati”.
Fotografia kishte edhe një përshkrim ku thuhej “Paraja e prish njeriun. Prandaj unë dua që populli të jetoj i varfër dhe pa PARA. Ministri i fukarallakut, e mallkoftë Zoti”.
Publikimi pretendon se ministri Murati ka deklaruar se dëshiron që populli të jetojë i varfër.
Krypometri më 11.11.2023 kontrolloi nëse informacioni i publikuar nga “Komente Politike” që u postua në grupin publik të Facebook-ut “Diaspora me PDK 👍” është i vërtetë.
Fillimsht janë kontrolluar materialet publike të postuara nga Ministri Murati në rrjetet sociale. Në kontrollimin e kryer me datë 11/09/2023 në rrjetin Facebook të Hekuran Muratit nuk janë gjetur deklarata të tilla.
Verifikimi ka kontrolluar edhe në përmbajtjet e deklaratave të Muratit në Kuvendin e Kosovës, por në transkriptet publike nuk është gjetur përmbajtje e tillë.
Për të verifikuar edhe më tutje këtë pretendim, Krypometri ka kontaktuar me përfaqësues të autorizuar të Hekuran Muratit.
Arlind Manxhuka zëdhënës i Lëvizjes Vetëvendosje me autorizim të Hekuran Muratit ka konfirmuar se një deklaratë e tillë nuk është thënë asnjëherë nga Murati.
“Ky është fake news. Ministri Murati asnjëherë nuk ka deklaruar diçka të tillë” ka deklaruar Manxhuka më 11.09.2023.
“Diaspora me PDK 👍” është grup publik në Facebook dhe materiali i publikuar në këtë rast është shpërndarë disa herë tek ndjekësit e grupit.