Lajmi i rremë i mediave për “Flamurin e Shqipërisë” në takimin Kurti – Lajçak

“Lajçak takon Kurtin, kreu i VV e pret me flamurin e Shqipërisë” – Euronews Albania.

“Albin Kurti nuk e vendosi flamurin e Kosovës në takim me Lajçakun” – Lajmi.net.

“Reagime pasi Kurti nuk e vendosi flamurin e Kosovës në takim me Lajçakun” – Reporteri.

Diplomati sllovak, Miroslav Lajçak, i cili është edhe i dërguari special i Bashkimit Evropian për dialogun mes Kosovës dhe Serbisë, po qëndron për një vizitë tre ditore në Kosovë.

Të hënën pasdite, nikoqir i Lajçakut ishte kreu i Lëvizjes Vetëvendosje, Albin Kurti.

Vetë i dërguari për dialogun Kosovë – Serbi nuk zgjodhi të flas para mediave rreth takimit, por u prononcua në rrjetin shoqëror Twitter. Ndërsa, Kurti në anën tjetër, foli për temat e takimit.

Menjëherë pas takimit mediat online publikuan lajmin se gjatë takimit në mes kryetarit të VV-së dhe emisarit të BE-së nuk kishte flamur të shtetit të Kosovës, por vetëm flamuri i Shqipërisë.

Kështu, mediat u shërbyen me një fotografi të vjetër e jo nga takimi i së hënës mes Kurtit dhe Lajçakut.

Ndër mediat e para që publikoi lajmin e pavërtetë rreth flamurit ishte media nga Shqipëria, “Euronews Albania”.

Lajmin kjo medie e prezantonte me një fotografi të vjetër, ndërsa në njërën prej fjalive të lajmit thuhej që në takim kishte vetëm flamur të Shqipërisë.

“Gjatë takimit mes Kurtit dhe Lajçak në sy ra fakti se në sallë gjendej vetëm një flamur i Shqipërisë”, thuhej në lajmin nga Euronews Albania.

Lajm të rremë kishte shkruar edhe lajmi.net. Ky portal e kishte përshkruar në tekst se takimi ka ndodhur në zyret ku ishte vetëm një flamur, ai i Shqipërisë. Përveç që titulli buronte nga përshkimi i një fotoje të vjetër, edhe brenda artikullit teksti mbështetet nga ajo fotografi.

“Por ajo çfarë sot u zbulua nga ky takim është se në zyrën e Kurtit mungonte flamuri i shtetit të Kosovës, raporton lajmi.net. Madje në zyrën e VV-së ku edhe u zhvillua takimi ishte vetëm flamuri kombëtar shqiptarë dhe jo ai i shtetit të Kosovës”, thuhet në artikullin e këtij mediumi.

Se në takimin mes Kurtit dhe Lajçak ishte vetëm një flamur, ai i Shqipërisë, e tha edhe portali tjetër “Reporteri”.

 

 

 

Ky botim është prodhuar me përkrahjen e Bashkimit Europian. Përmbajtja e këtij botimi është përgjegjësi e BIRN-it dhe në asnjë mënyrë nuk mund të konsiderohet si qëndrim i Bashkimit Europian.