Përgjysmohet vlera e Bitcoin-it
Vlera e Bitcoin ka vazhduar së rëni gjatë fundjavës pasi ra nën 34,000 dollarë , sipas shkëmbimit të kriptomonedhave Coinbase.
Kriptomonedha më e madhe në botë për nga vlera e tregut tani ka rënë me 50% që nga piku i saj në nëntor të vitit të kaluar.
Rënia e vlerës së aseteve dixhitale vjen pasi tregjet e aksioneve në mbarë botën gjithashtu shënuan rënie ditët e fundit.
Të hënën, disa tregje aziatike u shënuan rënie në indeksin standard Nikkei të Japonisë që ra me rreth 2%.
Bitcoin përbën rreth një të tretën e tregut të kriptomonedhave me një vlerë totale prej 650 miliardë dollarësh.
Ethereum, kriptomonedha e dytë më e madhe në botë, gjithashtu ka rënë në vlerë, me më shumë se 10% në javën e fundit.
Megjithëse pjesa më e madhe e vitit 2022 ka qenë relativisht e qetë për tregun e kriptomonedhave, tregtimi i paqëndrueshëm i aseteve dixhitale nuk ka qenë aq i pazakontë në vitet e mëparshme.
Tregtimi ka qenë i dominuar prej vitesh nga investitorë individualë, por kohët e fundit tregu ka parë një fluks investitorësh profesionistë, si fondet mbrojtëse dhe menaxherët e parave.
Me investitorët më tradicionalë që tregtojnë asete dixhitale, kriptovalutat kanë ndjekur gjithnjë e më shumë lëvizjet e tregjeve globale të aksioneve.
Shumë nga investitorët institucionalë që blejnë kriptovaluta i trajtojnë ato si asete me rrezik, të ngjashme me aksionet e teknologjisë.
Në kohët e pasigurisë së tregut, investitorët tradicionalë shpesh do t’i shesin ato që i shohin si asete më të rrezikshme dhe do t’i transferojnë paratë e tyre në investime më të sigurta.
Javën e kaluar, bankat qendrore anembanë botës, përfshirë SHBA-në, Britaninë e Madhe dhe Australinë, ngritën normat e interesit ndërkohë që përpiqeshin ta trajtonin rritjen e çmimeve.
Rezerva Federale e SHBA rriti normën e saj kryesore të huadhënies me gjysmë pikë përqindjeje, duke shënuar rritjen më të madhe të normës së saj në më shumë se 20 vjet.
Kjo ka shkaktuar më shumë shqetësime te disa investitorë se inflacioni dhe kostoja më e lartë e huamarrjes mund të kenë një ndikim të madh në rritjen ekonomike globale.
Investitorët janë gjithashtu të shqetësuar për ndikimin e luftës në Ukrainë në ekonominë botërore.
Ndërkohë, në vitin e fundit Bitcoin është bërë një kurs ligjor në dy shtete – El Salvador dhe Republikën e Afrikës Qendrore. Meqenëse El Salvador ka thënë se do t’i lejojë konsumatorët ta përdorin kriptomonedhën në të gjitha transaksionet, së bashku me dollarin amerikan, Fondi Monetar Ndërkombëtar i ka kërkuar ta anulojë vendimin e tij./BBC
