VIDEO - Rrëfimi i nënës për djalin e saj Yllin, porosia e saj për paragjykuesit
Florina Misini Grubi, është nëna e Yllit tashmë nëntë vjeçar, ardhja në jetë e fëmijës së saj të parë ka qenë një entuziazëm i madh, deri në javën e 35 të shtatzënisë atëherë kur Florinës ju deshtë të shtrihet me urgjencë në spital pasi që doktorët kishin vlerësuar se diçka nuk po shkonte mirë.
Pasi që ndodhi lindja e parakohshme Florina me djalin e saj qëndruan në spital, aty ku gjendja shëndetësore e Yllit u përkeqësua, por pas trajtimit ai ishte stabil dhe gati për të shkuar në shtëpi.
“Pas lëshimit nga spitali neve na rekomandohet që të bëjmë një kontrollë te mjeku kardiolog. E dërgojmë dhe ai thotë se është në rregull nuk ka asgjë, neve si prindër na është thënë se ka lindur para kohës dhe të mos shqetësohemi se është pak i vonshëm. Unë atëherë si nënë e re shprehjen pak i vonshëm se morra tragjike. Por kalonin muajt, Ylli nuk ishte si bebet tjera, filluam me dyshu se diçka nuk është në rregull. Me tetë muaj në vizitë te pediatrja më thotë që të ja bëjmë një kontrollë te neurologu, kjo ka qenë shok për ne. E dërgojmë në Neurologji në konstatimit thuhet se Ylli ka epilepsi, rezultoi se nuk është epilepsi, doli se është paralizë cerebrale. Nuk kam dashtë me pranu se kam ditë çka është, por vetëm emri nuk më ka pëlqye. Kur ishim në Shkup doktori e konstatoi se është paralizë cerebrale”, thotë ajo.
Pas diagnostikimit ajo bashkë me bashkëshortin mbledhin forcat dhe merren me trajtimin e Yllit, Florina thotë se ata vazhdojnë të bëjnë gjithçka që është në dorën e tyre që Ylli të ketë mundësi më të mira për jetesë.
Ylli gëzon një mbështetje financiare nga shteti, por që nëna e tij thotë se vështirësitë në trajtimin e fëmijëve me nevoja të veçanta si prindër i hasin në çdo hap. Florina tregon se mungesa e barnave për këta fëmijë në institucione publike shëndetësore është një problem i madh.
Të pyetur nga KALLXO.com se a do të jenë pjesë e listës esenciale barnat për fëmijë me nevoja të veçanta varësisht nga lloji që ju duhet Ministria e Shëndetësisë thotë se tashmë e ka hedhur në konsultim publik listën e barnave esenciale, duke mos dhënë më shumë detaje.
“Ministria e Shëndetësisë ka hedhur në konsultime publik ditën e martë draftin e Listës së Barnave Esenciale në mënyrë që profesionistët shëndetësor, pacientët, subjektet farmaceutike, shoqatat e ndryshme profesionale dhe publiku të jetë i informuar se cilat produkte janë propozuar që të jenë në Listën e re Esenciale, eventualisht të japin komente shtesë rreth kësaj liste, para se e njëjta të nënshkruhet nga Ministri”, thuhet në përgjigjen e tyre.
Nga ana tjetër Ylli edhe pse është tashmë nëntë vjeçar nuk vijon mësimet sepse në shkollat e vendit nuk ofrohen kushtet që këta fëmijë të kenë mundësi për të nxënë mësimin në hap me të tjerët.
“Një prej arsyeve pse unë nuk e dërgoj Yllin në shkollë është se nuk ka staf adekuat që duhet me u marrë me të. Ylli është në karrocë, atij i duhet një asistente për me dërgu brenda në shkollë, një mësuese mbështetëse, logopedi, duhet edhe një ftiziatër, psikologu. Sot e dijmë që një psikolog punon në dy apo tri shkolla që është absurde për kohën në të cilën jemi sot tu jetu”, thotë ajo.
Ndërsa tregon se edhe sot ka njerëz që kanë paragjykime ndaj fëmijëve me nevoja të veçanta.
Fondi për Fëmijë i Kombeve të Bashkuara UNICEF thotë se prej gjithsej, 43 mijë fëmijëve me nevoja të veçanta, sa vlerësohet të jenë në Kosovë, vetëm 5 mijë e 300 prej tyre vijojnë mësimet në shkollat e rregullta.
Organizata thotë se një grup i konsiderueshëm i objekteve të vjetra pa tualete të duhura, me laboratorë në katin e dytë dhe pa pjerrina, mbeten pengesë për realizimin e të drejtës për arsim të fëmijëve me aftësi të kufizuara.
Nga ana tjetër nëna e Yllit thotë se përveç halleve të tjera ekziston edhe një qasje paragjykuese e njerëzve ndaj të cilës ajo tashmë e ka një përgjigje të thjeshtë.
“Unë dal me Yllin si sot, si kudo në park, në kafe, kudo që shkoj afrohen fëmijët edhe pa dashje pyesin se ‘përse në karrocë?’ Por paragjykimi vjen nga prindërit, shpesh kam hasur në atë hajde largohu se është në karrocë, ose nuk kanë fol hiç, por e kanë marrë fëmijën e kanë larguar nga aty, nuk kam fol hiç por i kam përcjellë me një buzëqeshje se nuk dua askënd me e s`provu Zoti me një fëmijë me nevoja të veçanta, por unë jam me fat që e kam Yllin”, thotë ajo.
Florina porosit çdo prind që ta shohin si bekim fëmijën e tyre dhe të mos ndikohen nga paragjykimet e rrethit. Ajo thotë se këta fëmijë mbi të gjitha kanë nevojë për dashuri, ndërsa tregon se ajo vazhdimisht sheh progres te djali i saj pasi që ai trajtohet me dashuri e kujdes të vazhdueshëm. Sipas Florinës të qenurit i varur nga karroca nuk e privon Yllin të shijoj natyrën dhe daljet e përditshme.
