Gjykimi ndaj të akuzuarit për terrorizëm, palët japin fjalët përfundimtare
Gjykimi ndaj të akuzuarit për pjesëmarrje në grupin terrorist ISIS, Blerim Syla i është afruar fundit me dhënien e fjalëve përmbyllëse në seancë, më 03.04.2025.
Prokuroria Speciale (PSRK) dhe mbrojtësi i të akuzuarit kanë paraqitur pretendimet e tyre lidhur me këtë rast.
Nga PSRK Habibe Salihu ka kërkuar që i akuzuari të dënohet sipas Ligjeve në fuqi, pasi nga provat e administruara është vërtetuar në tërësi fakti se i njëjti kishte marrë pjesë në grupin terrorist ISIS.
“Gjatë shqyrtimeve të mbajtura janë administruar provat nga të cilat pa mëdyshje është vërtetuar që Blerim Syla, me qëllim që t’i bashkohet ISIS-it më 13.11.2013, ka udhëtuar në Stamboll dhe është vërtetuar që nga aty ka shkuar në Hatai për të vazhduar në Siri, ku më pas i njëjti është vendosur në Qendër Stërvitore.” – elaboroi fjalën përfundimtare prokurorja Salihu.
Prokurorja më tutje shtoi se nga provat e tjera, siç janë mesazhet telefonike që i akuzuari i ka shkëmbyer me familjarët e tij, vërtetohet ku kishte qenë i njëjti, me kë kishte qenë dhe informacione për persona të tjerë të cilët gjendeshin aty.
Fjalën përfundimtare për këtë rast e ka dhënë edhe avokati i të akuzuarit Syla, Besnik Berisha.
Avokati i të akuzuarit Syla kërkoi që të lirohet nga akuza klienti i tij, duke thënë që të shikohet përtej statistikave dhe premtimeve që ishin dhënë dikur, lidhur me rastin e shkuarjes së kosovarëve në Siri.
Tutje, ai kërkoi që në rast se Trupi Gjykues merr Vendim tjetër pos lirimit nga akuza të merren për bazë rrethanat, si mosha, gjendja familjare dhe të tjera.
“Ju lus që përtej statistikave e përtej premtimeve që janë dhënë dikur, e që Drejtësia i ka përqafu, se ka qenë momenti, ta lironi Blerimin Sylën për terrorizëm, nëse ju nuk pajtoheni me mua, e që interpretimet e mia mund të jenë retorikë mbrojtëse, ju kisha lutur që ta keni parasysh moshën, familjen, prind, që si i ri ka punu prej ditës së parë pa shku në Siri, dhe që familja e tij i kanë sytë në Blerimin. Blerimi nga dita kur është ekstradu nga Maqedonia, për të cilën ka bo Kërkesë vullnetare me kthy ma shpejt, e deri sot s’kemi bo Kërkesë për ndërprerjen e paraburgimit, se kemi dashtë me i dhanë fund gjykimit.” – tha avokati i të akuzuarit Syla.
Avokati i të akuzuarit në fjalën përfundimtare atakoi provat që Prokuroria pretendon se i ka ndaj Sylës – duke e konsideruar si të jashtëligjshme dhe kundërkushtetuese nxjerrjen e transkriptit të mesazheve telefonike, për të cilat tha se nuk ka asgjë inkriminuese në to.
“Transkriptet e SMS-ve për zotrinë Syla, të gjitha bashkë e secila veç e veç e konfirmojnë vetëm një fakt, që janë të kundërligjshme dhe jokushtetuese, se Blerimi ka udhëtu për në Siri dhe që nuk ka mbërri në Siri, e që nana thirri e tha kthehu para Vitit të Ri.” – tha avokati i të akuzuarit Syla.
Këtë rast janë duke e gjykuar Ngadhnjim Arrni, Kujtim Krasniqi dhe Kushtrim Shyti.
Çfarë thotë Dosja e Prokurorisë?
Sipas Aktakuzës së Prokurorisë Speciale të Kosovës, Blerim Syla akuzohet për pjesëmarrje në grupe terroriste dhe atë në grupin terrorist ISIS.
Sipas Prokurorisë Syla, më 03.11.2013, kishte udhëtuar në Stamboll të Turqisë për të shkuar pastaj në qytetin e Hatait.
Rrugëtimi i Sylës, sipas Prokurorisë, nuk kishte mbaruar me kaq, pasi që i njëjti më pas kishte vazhduar rrugën për në qytetin Hatai të Turqisë, me destinacion të fundit qytetin Azra të Sirisë.
Arritja e Sylës nuk ishte e rastësishme, pasi që sipas Prokurorisë ai ishte vendosur në një Qendër Stërvitore, ku kishte kryer ushtrime në një nga qytetet e Sirisë.
Stërvitjet për gjuajtje me armë i kishte bërë për angazhim dhe pjesëmarrje në luftime dhe sipas Prokurorisë i akuzuari kishte qëndruar për tre muaj në Siri.
Më 17.05.2014, Syla kishte marrë rrugën për t’u kthyer në Kosovë. (Në fjalën përfundimtare prokurorja speciale Habibe Salihu ka bërë precizimin e Aktakuzës, ku datën e cekur e ka hequr nga Dispozitivi i Aktakuzës dhe e ka shtuar me fjalinë “Deri kur është kthyer në Kosovë”).
Veprime këto të Blerim Sylës që sipas Prokurorisë kanë konsumuar elementet e veprës penale “pjesëmarrje në grupe terroriste”.
Për veprën e specifikuar si më lart sipas Kodit të vjetër Penal me të cilin do të gjykohet i akuzuari dënohet nga 5 vjet dënim me burg deri në 10 vjet.
“Kushdo që merr pjesë në veprimtaritë e grupit terrorist dënohet me burgim prej pesë (5) deri në dhjetë (10) vjet.” – thotë Paragrafi me të cilin akuzohet Blerim Syla.
Lidhur me veprime të ngjashme, ku qytetarë të Kosovës i ishin bashkuar grupeve të caktuara për të luftuar në Siri, Gjykata e Prishtinës kishte trajtuar dhjetëra raste.
Syla kishte qenë duke u gjykuar së bashku me disa persona të tjerë, por procedura ndaj tij ishte veçuar, pasi i njëjti ka qenë në arrati që nga viti 2015, ndërsa i njëjti është sjellë në Kosovë përmes procedurës së ekstradimit nga shteti i Maqedonisë së Veriut.
